Konduktor, tsuper kan viaje Naga-Manila mga naka-PPE

Masikad na puon ngunian na Juevez, Hulyo 1, 2021 an viaje kan Naga-Manila bus alagad premiro sa Bicol na an konduktor asin tsuper nakasulot nin Personal Protective Equipment (PPE) bilang proteksyon laban sa coronavirus disease (Covid- 19).

Alagad sinabi ni Operation Manager Roderick ‘‘Nonoy’’ Reforsado kan Bicol Central Station (BCS) saro sanang bus kan BLTB company an ma-viaje dawa na ngani apat na unit nin bus an tinawan QR code kan Land Transportation Franchising and Regulatory Board (LTFRB). An QR code iyo an karibay kan dating pig-isyu special permit kan ahencia.

An pagsulot nin PPEs kan konduktor asin tsuper pig-adaptar sa bus terminal sa rehiyon otso.

Sa Hulyo 1, alas 6:00 nin banggui mahale man an bus sa BCS mantang si hale sa Manila naghale alas 6:00 nin banggui kan Hunyo 30.

An hale sa Ciudad nin Naga deretso an viaje asin dapat ibaba an pasajeros sa Parañaque Integrated Terminal Exchange.

Napagkasundoan an magiging talaan kan viaje hali sa Parañaque terminal asin ipapasunod ninda an ‘‘even number’’ sa Hunyo 30, Hulyo 2, 4, 8 asin sa mga masunod na aldaw. Si Hale sa BCS pasiring sa Parañaque dapat sunodon an ‘‘odd number’’ puon Hulyo 1, 3, 5, 7, 9 asin masunod na mga aldaw.

An viaje alas 6:00 nin banggui hale sa Parañaque asin alas 6:00 nin banggui si hale sa BCS.

Estrictong iimplementar an health and safety protocols kabale na digdi asin dapat cincuenta por ciento sana an sitting capacity.

Igwa nang koordinasyon an manjamiento kan BCS asin an bus company sa bus terminal sa Parañaque sa pagbuelta kan inter-regional route.

Saro munang unit bus an ma-viaje mantang kulang pa an pasajeros asin naka-standby an tolo pang iba. An ibang bus company nasa proceso naman sa LTFRB nganing ma-isyuhan sinda nin QR code. (dpa)