LGU nagpapasunod 15 diyas na liquor ban

Calabanga, Camarines Sur --- Kasunod kan padagos na paglangkaw kan coronavirus disease sa banwaan na ini an lokal na gobierno estricto nang nag-iimplementar kan liquor ban puon kan Mayo 1 hasta 15, 2021 nganing makontrol an local transmission kan virus.

Ini an desisyon kan Inter-Agency Task Force kan lokal na gobierno sa pamamayo ni Alcalde Eduardo Severo mantang enot naman sindang nag-declara na ipasa-irarum sa General Community Quarantine (GCQ) sagcod na estrictong nagpapasunod kan health protocols.

Alagad posibleng palawigon pa an quince diyas na liquor ban depende kun magpapadagos pa an halangkaw na caso kan ‘‘deadly virus’’.

Huli kan liquor ban ibinababawal an pagpabakal asin magbakal nin nakaka-burat na arak.

Kabale sa pinaluwas na direktiba kan jefe ejecutivo iyo an pagsara kan mga recreational facilities, function hall, beer houses, resort, asin iba pang facilidades na pinagtitiriponan kan tawo.

Sinabi pa ni Severo base sa pag-aadal kan local IATF naging kampante an mga tawo dakul na an mga nag-aarabutan na returning residence hale sa National Capital Region na iyo an epicenter kan virus.

Dakul an nagtitiripon-tipon sa barangay, yaon an irinuman sa barangay na saro ini sa causa asin yaon na an local transmission sa kanya-kanyang familia, sabi pa kan alcalde.

Nagpa-bandilyo na an LGU na estricto nang iimplementar an health and safety protocols asin si madadakop dapat isyuhan nin citation ticket nganing pamultahon.

Dai palang nahahaloy si Presidente Rodrigo Duterte nagpaluwas nin direktiba sa Department of Interior and Local Government (DILG) na dapat iimplementar kan LGUs asin barangay an gabos na health protocols asin kun si magiging pabaya igwang sisimbagan nganing casohan administratibo asin kriminal. (DPA)