Mabatang parong kan SLF sa Naga abot na sa Pili, CS

Pili, Camarines Sur --- An masangsang na parong kan basura sa Sanitary Landfill (SLF) sa barangay San Isidro, Ciudad nin Naga pigrereclamo na kan mga residente sa banwaan na ini na mayor na apektado an mga taga Yubo asin Palestina.

Nakaabot na sa opisina ni Alcalde Tomas Bongalonta an reclamo kan residentes alagad tolos man pinaabot kan jefe ejecutivo sa City Hall kan Ciudad nin Naga nganing gibohan nin solusyon an malaen na parong kan tambakan basura na harani na sa barangay kan Kabesira kan provincia nin Camarines Sur.

Si Engr. Joel Martin, jefe kan Solid Waste Management Office (SWMO) kan lokal na gobierno kan ciudad nagpahayag na sainda nang ginigibohan nin paagi nganing dai magpara-alisngaw an malaen na parong sa basura.

Dai palang nahahaloy nag-abot na an saindang makinarya sa Water Treatment Facility (WTF) kan SLF na iyo an makakaresolber sa reclamo kan mga residente kan Pili.

Naabala an pag-abot kan makinarya huli kan pandemya, sabi pa ni Engr. Martin.

Alagad sa masunod na mga semana piglalaoman na mahahanapan nin solusyon mientras na nag-abot na an makinarya sa WTF.

Saro sa causa kan mabatang parong kan SLF huli kan padagos na pagbagonas nin uran.

Bako lang sa banwaan kan Pili maging sa barangay Del Rosario, Ciudad nin Naga apektado naman, sabi pa sa reclamo.