Magkapamilya nagtaragaan 4 gadan, suspechado nagsuko

Apat an gadan sa taragaan asin pambabadil sa iriwal kan familia sa daga sa barangay Beberon, San Fernando, Camarines Sur alas 7:00 nin aga mantang an suspechado na may tama man nin taga pugol na kan Municipal Police Station.


An madugong incidente nangyari kan Sabado, Deciembre 7 kan magkasarabatan an mga biktima asin suspechado na may darang armas na sundang asin badil.


Si Police Cpl. Joker Mayores, imbestigador kan MPS San Fernando PNP binisto an mga biktima na sinda Miral Rentoria, 54 anyos; Alexander Rentoria, 62 anyos; asin Noel Rentoria, 64 anyos mientras an saro naman na suspechado na may tama man nin taga binawian man sana nin buhay na si Laurio Rentoria, 70 anyos.


Sinabi kan imbestigador dai nagduwa-duwa an familia kan mga biktima na idagos an pagplantiar nindang mga casong pang-gagadan sa corte contra ki Larry Rentoria, 38 anyos na saro sa mga suspechado.


Igwa nang nagtaong testimoniya nganing atubangon kan suspechado an mga caso sa jusgado na nagsuko man sana sa pulis alagad may tama nin taga sa likod.


An ibang testigos na nagpahayag sa awtoridad an krimen nangyari kan magkaigwa nin mainit na diskusyonan sa iriwal sa daga an magtugang na sinda Lauro asin Alexander.


Sinabi pa na si Larry iyo an may bitbit nin dai pa maaraman na de calibreng badil asin nabadil kaini si Miral mantang an duwang biktima tinamaan nin nagkaperang beses nin tigbas kan matarum na sundang.


An iriwal kan magturogan enot nang dinara sa Barangay Capitan alagad dai nagkasurondo sagcod na nag-arabutan sa jusgado asin sa ngunian pendiente pa.