MNWD andam na sa El Niño

An Metropolitan Naga Water District (MNWD), igwa nang mga pag-andam sa posibleng pagluya kan suplay nin tubig sa tahaw kan anuncio sa El Niño ngunian na taon kan Philippine Atmospheric and Geophysical Astronomical Services Administration (PAGASA).

Si General Manager Florencio Mongoso Jr. kan MNWD nagpahayag sa Bicol Mail na mamatian an El Niño poon ngunian na Enero hasta Hunyo asin igwa na sindang mga preparasyon sa paagi kan pagbakal nin 17 bagong mga makina nganing ribayan si mga loma nang ginagamit kan mga pumping stations para makusog an pressure kan tubig asin makatipid pa sa kuryente.

Natapos nang mahulbot si 14 lomang makina asin naribayan nang bago mantang isusunod si tolo pang iba ngunian na bulan.

Afuera kaini makakahabol pa an bagong mga pumping stations siring kan Carolina 4 na nagbobogang 60 liters per second (LPS) na dai palang nahahaloy operational na mantang an Pacol 5 na nagbobogang 30 LPS, saka Almeda 2 na nagbobogang 10 LPS. Dakulang suporta an mga pumping stations na ini nganing mahipnoan an pagluya kan bulos nin tubig sa panahon kan El Niño alagad sa piglalaoman magiging operational sa Febrero 2024.

Si mga hinulbot na lomang makina naka-reserba encaso mag-aberiya an makina nganing dai apektado an serbisyo kan water district.

Naresolberan an mga lomang makina sa mga pumping stations mantang an fondo na ginamit hali sa P18-M na profit kan water district base sa pinakahuring record kan Noviembre 2023.

An pagluya kan suplay nin tubig hali sa water spring sa Mt. Isarog na nagkukua digdi nin 30 por ciento kan total na suplay nagbaba poon kan Septiembre 2023 mala ngani 26 LPS nalang huli kan El Niño.

Mientras tanto, kabali pa sa mga pig-andaman huli ta nagpaparadakul an mga darakulang edificio asin residencia sa ciudad iyo an dugang na sampolong pumping stations na an fondo maghahali sa water rate increase na sagcod sa ngunian pendiente pa sa Local Water Utilities Administration.