MOA KAN DPWH, DoE, NEA IGINILID: LGU iyo na an mapirit garaboton an ulang na mga poste kan Casureco

An haloy nang ulang sa mga road right of way magpapadagos na dai mahali-hali an mga electrical post kan Camarines Sur II Electric Cooperative (Casureco II) matapos palawigon pa an mga bulan nganing garaboton na an ulang na mga poste sa tinampo.


Alagad an City Hall iyo na ma-aksyon na garaboton an ulang na poste sa road right of way kan DPWH sa paagi kan ‘‘Telco Ordinance of Naga City’’


Kinumfirmar ni Assistant District Engr. Richard Emmanuel Ragragio kan Camarines Sur 3rd Engineering District kan Department of Public Works and Highways (DPWH) na nagkasurondo an saindang opisina central sa Manila, Department of Energy asin National Electrification Administration na tawan pa nin panahon an mga electric cooperative nganing totalmente nang ma-implementar an relokasyon kan mga poste sa tamang lugar.


Matulong taon na an memorandum of agreement kan DPWH asin kan Casureco II panahon pa ni dating Project Supervisor/AGM Nelson Lalas dai natapos an relokasyon sagcod na naghagad nin extension asin nag-uyon an mga ahencia na nakapirma sa MOA.


Sa ngunian sa Ciudad nin Naga an mga electrical post na dai na-ibabalyo iyo an yaon sa kalabaan kan Liboton Street, igwa sa barangay San Felipe asin igwa pa sa barangay Bagumbayan.


Alagad an City Hall dai na nakahalat kan abalahon na aksyon kan Casureco II nagpasar na nin Ordinansa numerado 2021-047 na mas midmid sa ‘‘Telco Ordinance of Naga City’’.


An ordinansa epektivo na matapos ma-aprobaran kan Hunyo 15, 2021 na nag-iimponer nin penalidad sa operation officer o manager kan public utility firm asin multa sagcod na pagkaka-priso kun padagos na magsisinutil na mag-relocate an cooperativa nin electricidad asin an Telecommunication firms.


Mga poste kan Casureco II asin mga linya o inaapod na ‘‘pancit’’ kan mga telcos an dapat magkaharale na asin obligado na sinda magsunod sa ley.


An DPWH pabor sa ordinansa kan lokal na gobierno kan Ciudad nin Naga mantang an ulang na mga poste sa tinampo nakaka-abala sa road widening project kan obras publica.


Igwa nang pigcrear Inter-Agency Task Force nganing mag-monitor kun hinaharale na an ulang na mga poste asin pancit kan Telco.


Kun mayo pang ginigibong pagharale an City Hall mapadara nin final demand nganing i-relocate na an mga poste asin kable kan mga Telco alagad kun mayong aksyon ma-isyu nin notice of violation an gobierno lokal sa laog nin pitong aldaw puon na marecibe an ‘‘final demand to relocate’’. (dpa)