MUNUMENTO NI ANDRES BONIFACIO: Plano kan proyekto limang taon tinuturogan kan ACTO

Bako lang sarong taon alagad limang taon nang tinuturogan an resolusyon kan Sangguniang Panlungsod kan Ciudad nin Naga na nagdidirehir sa Arts, Culture and Tourism Office (ACTO) na maghanap nin tamang lugar asin plano kan tutugdokan kan Gat Andres Bonifacio Monument.


‘‘Dismayado sa nangyayari, dismayado asin nauuyaman’’ an opisina kan ACTO na pinapa-mayohan ni Alec Francis A. Santos apesar pigpadrenohan ni Consejal Elmer Baldemoro an resolusyon kan taon pang 2016 inabot na nin limang taon ngunian na 2021 alagad mayo pa nasisiripan an plano, sabi ni Consejal Salvador Del Castillo.


If may negligence na naheheling dapat sangatan nin magkakanigong aksyon kan sanggunian, segun pa sa consejal.


Si Del Castillo dai malilingawan an resolusyon mantang sinda ni Baldemoro iyo an nagpadreno kan resolusyon mayong kasimbagan asin aksyon an jefe kan ACTO.


Si Santos pigtalaan kuta nang imbitaran sa sesyon regular kan SP kan Deciembre 14 alagad kinanselar huli kan saiyang actividad. Dai man siya makuanan lado mantang mayo sa opisina huli ta nasa pagbabakasyon.


Sa ika-duwang sesyon regular kan SP sa Enero 2022 kaipuhan na siyang mag-atubang nganing magpaliwanag kan kapabayaan kan saindang opisina huli ta 2016 alagad sagcod sa ngunian mayo pang report sa sanggunian.


Kun babalikan an istorya kun bakong gayo sa pag-imponer kan Estados Unidos an national hero kan Filipinas si Gat Andres Bonifacio bako si Dr. Jose Rizal.


Naunambitan pa kan consejal digdi sa Ciudad nin Naga mas marhay pa si Jose Maria Panganiban na sarong parasurat igwang munumento sa Naga City Central School 1.


Sinabi man ni Baldemoro na si Bonifacio saro man sa national hero asin ama kan Philippine revolution kun bako dahil saiya baka dai pa kita libredo sa pananakop kan dayuhan na haros parejo man an naging kontribusyon ni Dr. Rizal.


Igwa nang tolong munumento si Rizal sa ciudad alagad si Bonifacio na limang taon na an resolusyon kan SP dai maaraman kun ano an ginigibo kan opisina ni Santos kan ACTO.


Kun magkaigwa na nin mumumento si Andres Bonifacio cada Noviembre 30 sa kamundagan niya magkakaigwa na nin selebrasyon sa ciudad, sabi pa kan consejal.


Nagtutubod an consejal na dapat marealisar an proyekto sa presenteng termino asin dai sinda abuton kan eleksyon sa Mayo 2022. (DPAureus)