Nagkaperang banwaan sa Bicol nasa critical status sa Covid-19

An Department of Health (DOH) Bicol nagkumfirmar na anom nang mga banwaan sa rehiyon an nasa critical status sa coronavirus disease mantang tolong ciudades an pinasa-irarum na sa alert level 4.


An mga banwaan kinababalehan kan Manito asin Sto Domingo, parejo kan provincia nin Albay, Talisay, Camarines Norte, Tigaon, Camarines Sur, Bagamanoc, Bato, asin San Andres gabos sa Catanduanes asin Dimasalang, Masbate.


An mga ciudad na nasa alert level 4 iyo an Legazpi, Naga asin Masbate alagad an LGU Naga, ipinahayag ni Alcalde Nelson Legacion na nagsurat sinda sa national IATF na ireconsiderar giraray sa alert level 3.


An dahilan an ciudad nasa 96 por ciento na an mga bakunado asin nagpapadagos mantang igwa pang suplay kan vaccine. Afuera pa kaini, mga mild cases sana an caso sa ciudad.


An City Hall estrictong pigbabawal sa manga establisimiento na magpalaog nin mga parokyano kun dai pa mga bakunado.


Sinabi ni Dr. Chito Avelino ka DOH Bicol nagsabi an padagos na paglangkaw kan caso kan Covid-19 sa Kabikolan saro causa nganing magdeclara sinda nin critical status sa nagkaperang mga banwaan asin alert level 4 sa tolong ciudades.


Nahahadit man an mga negosyante kun nasa alert level 4 ciertong apektado naman an saindang negosyo sagcod na temporaryong magsara kan establismiento.


Sa listahan kan ahencia, igwa nang total na 54,388 na caso alagad kan Enero 21 sana igwang 573 o igwa nang 1.78 por ciento paglangkaw kan caso.


Nangapudan an DOH Bicol sa mga lokal na gobierno na maging estricto sa health and safety protocols.


An mga LGUs nag-andam na kan saindang mga quarantine facilities na igwa nang mga naka-cuarentinang pasyente.

Maging man sa mga hospital naglalangkaw na an mga caso kan piglalaog na mga pasyente sa virus.