Nagsukong NPAs magiging soldados na kan gobierno

Sunod-sunod na an pagsuko sa gobierno kan mga rebeldeng New People’s Army (NPA) sa Bicol alagad an iba sa sainda na mga calificado kukuanon kan 9th Infantry Division kan Philippine Army nganing maging soldados.

Dai palang nahahaloy igwa nang maabot sa cuarentang (40) miembros kan CPP/NPA sa Camarines Sur an nagsaruko sa 9th ID na may base sa Camp Elias Angeles, Pili, Camarines Sur afuera kan na enot na cuarentang returnees sa Masbate asin Sorsogon kan nagtalikod na taon.

Sinabi ni Army Captain Paul John Belleza, opisyales na parataram kan 9th ID sa Bicol na ini an saindang saro sa mga programa alagad si ibang dating rebelde puede pang maging miembro kan Citizen Armed Forces Geographical Unit (Cafgu).

Kabale sa puedeng akoon dapat tapos dawa sa secondary school o high school asin physically fit.

Dawa nagtapos na sa NPA combat operations alagad an mga nagsurokong rebelde na kukuanon na soldados kan gobierno maagi sa regular na training kan Philippine Army.

Dawa nag-agi na sinda sa mga training sa paggamit nin armas asin combat operations kan CPP/NPA alagad kinakaipuhan magtapos sinda sa anom na bulan na training course siring kan mga inaagihan na combat operations training kan mga nag-gragraduar sa 9th ID.

Maging an pagkalap nin Cafgu igwa man sindang suhay na training bako lang sa pagkapot nin armas envez kun panong magiging disiplinado oras maging nang regular na miembros.

Sinabi pa ni Belleza na nagdadakul an nagsusukong mga CPP/NPA sa Bicol huli ta pagal sinda katatago asin mayong futuro sa padagos na pagtumang sa gobierno.

An mga returnees igwa pang mga biyaya na binabayadan kan gobierno an saindang pigsukong armas.

Igwa pang livelihood project na makakatabang pa sa saindang hanapbuhay kaya ngani nagdadakul na an na-eenganyar na rebelde na magbalik loob.