NAKATALAAN IPAOTOB: Diversion program para sa mga aki na imbwelto sa droga

Pigtawan-doon ni Atty Bernadette Mapue-Joaquin, hepe kan Policy and Research Division kan Juvenile Justice and Welfare Council, an diversion program para sa mga hoben, below 18 years old na imbwelto sa iligal na droga.

Sa sarong webinar, na pigpangenotan kan Naga City Dangerous Drugs Board, pigsabi kan abogada na maninigo na isairarom an aki, na nakuanan nin drug paraphernalia o nadakop na naggagamit nin illegal na droga sa enot na pagkakataon, na magsairarom sa diversion program kun saen dae na kaipuhan na magsairarom sa formal court proceedings alagad sa reintegration.

Mamanduhan kan barangay kapitan asin kan Local Social Welfare and Development Officer (LSWDO) an diversion program kan aki na nakuanan kan nasambit na kasangkapan o nadakop na naggamit nin illegal na droga sa enot na pagkakataon sa laog kan dae malampas sa anom na taon.

Segun pa ki Joaquin, sa paagi kan diversion program, manunudan kan aki na responsable ini sa opensang piggibo na dae nag-agi sa korte.

Isasairarom sa programa nin anom sagkod 12 taon an mga aki na madadakop naggagamit nin illegal na droga sa ikaduwang pagkakataon susug sa desisyon asin pagmando kan korte, kaiba an LSWDO asin an Barangay Council for the Protection of Children.

Piglinaw ni Joaquin, kun kaipuhan na iagi an child offender sa court proceedings asin guilty sa opensa na piggibo, automatic an suspensyon kan sentensya tanganing matawan nin pagkakataon para sa rehabilitation sagkod na mag 21-anyos.

Kun dae madara sa rehabilitation, dadarahon sa maninigong pasilidad na suhay sa adult offenders na nasa kustodiya kan Bureau of Corrections.