P33-B pigtagamang fondo sa pagdraga kan Bicol River

An Office of the Presidential Adviser for Bicol Affairs (OPABA) nagpahayag na multi-billion peso an ipapabulos kan gobierno nasyonal sa proyekto kan pagdraga kan Bicol River Basin nganing mapararum an salog asin makatabang sa pagresolber kan haloy nang problema sa tubig baha sa Camarines Sur.

Taon-taon igwang alokasyon an gobierno nasyonal asin ini maabot sa total na Php33 bilyon, sabi ni Undersecretary Marvel Clavecilla.


Saiya pang sinabi sa direktiva ni Presidente Rodrigo Duterte dapat an implementasyon kan proyekto by administration sa pagtarabangan kan Department of Public Works and Highways (DPWH), Department of Environment and Natural Resources (DENR) asin National Housing Authority (NHA).


An Bicol River Restoration piglansar sa paagi nin sarong seremonya sa pagdraga asin pagtanom nin kawayan sa gilid kan salog na ginibo kan Marso 23, 2021 sa Camaligan, Camarines Sur.


An actividad inatendiran kan mga halangkaw na opisyal kan DPWH, DENR, NHA, OCD, Gobernador Migz Villafuerte asin diputado LRay Villafuerte kan segundo distrito kan Camarines Sur.


Sinabi pa ni Clavecilla an proyekto narealisar kan magbisita sa Camarines Sur si Presidente Duterte kan Noviembre 15, 2020 matapos kan sunod-sunod na bagyo sa Bicol na saro pinaabot na problema kan provincia an permi nalang na hararum na mga tubig baha sa mga kababan na lugar kun nagkakaigwa nin calamidad.


Sinda Gobernador Villafuerte asin diputado Villafuerte iyo an nagrecomendar na makakatabang sa pagresolber kan tubig baha iyo an pagdraga kan Bicol River.


An propuesto dai man nagduwa-duwa si Duterte asin saiyang sinuportaran asin tinawan nin dakulang alokasyon nganing mapunan na an proyekto.


Kun nagkakaigwa nin halawig na mga pagbulos nin uran sa Camarines Norte asin Albay an tubig baha nabagsak sa Camarines Sur sa paagi kan Bicol River.


An Camarines Sur iyo an inaapod na ‘‘catch basin’’ kan tubig baha kun nagkakaigwa nin maraot na panahon na may dara nin halawig na mga pagbulos uran.


Sa proposal ni Gobernador Villafuerte an dakulang proyekto envuelto digdi an sampolo hasta viente anyos na implementasyon nganing maresolberan an tubig baha sa provincia.


An salog puon sa Lake Bato pasiring sa 94 kilometros sundo sa San Miguel Bay, asin naagi sa Ciudad nin Naga.


An Bicol River nasumpay sa Libmanan, Sipocot, Naga asin Yabu Rivers. (DPAureus)