top of page

PADAGOS SA DRY RUN: Operasyon kan PNR Bicol aaprubaran ngona kan Mla

Hinahalat nalang kan lokal na manijamiento kan Philippine National Railways (PNR) sa Ciudad nin Naga an apruval kan saindang Operation Department sa Manila kun nuarin an full operation kan viaje kan perrokaril hali sa Camarines Sur sundo sa Albay.


Si Gregorio ‘‘Greg’’ Mano, spokesperson kan PNR sa Ciudad nin Naga nagpahayag sa Bicol Mail nagtutubod sinda magiging operational an perrokaril sa viajeng Naga Station sundo sa Ligao Station sa provincia nin Albay sa sunod na bulan nin Agosto mantang harani na an Peñafrancia fiesta nganing dakul pasajeros makinabang sa baratong flete.


An mga inaagihan na PNR Station iyo an Pili, Baao, Bato, Nabua asin Ciudad nin Iriga, gabos sa Camarines Sur mantang sa Polangui, Oas, asin Ciudad nin Ligao, gabos kan Albay.


Sa ngunian tolong kotse alagad posibleng gibohon sagcod sa lima mientras na hihalat an ipapadara digdi sa Bicol.


Sinabi pa ni Mano an sarong kotse igwang capacidad sagcod sa sangatos na pasajeros.


ILLEGAL CROSSING KAN LGUs, NATUYAWAN


Sa ginibong dry run kan nakaaging semana nagkapera an mga nadiscobre siring kan illegal crossing na binugtak kan mga LGUs, mga nakalaylay na secondary line kan Casureco II asin Casureco III asin linya kan telcos.


Pigconsiderar nalang an mga illegal crossing nagsurat na sinda sa LGUs na apektado na dapat igwang mamantenir nganing iwas disgracia. Mataong paisi an manijamiento kun anong oras maagi an Commuter Train na dapat igwang bantay dawa barangay tanod. (dpa)

bottom of page