Panahon na nin El Niño, Bicol dai pa apektado

An National Irrigation Administration (NIA) sa Bicol nagtutubod na posibleng pag-alang sana an mamation sa rehiyon alagad dai man totalmenteng apektado kan El Niño.

Huli kaini, piglalaoman na malangkaw an produksyon nin ani sa paroy mantang igwa nang mga ginibong pag-andam sa mga patubig an ahencia, sabi ni Regional Director Guadencio De Vera kan mag-atubang sa miembros kan media.

Kun sa ibang mga rehiyon naghahagad na nin cloud seeding alagad digdi sa Kabikolan nagpapadagos pa an mga pag-uran asin matubig pa an kaomahan asin yaon pa an patubig kan NIA.

Igwa nang pigdistrubuer an ahencia nin makinarya nganing gamiton sa patubig kun nag-aalang an kaomahan.

Igwa nang preparadong walong backhoe an NIA Bicol nganing iwarak sa anom na provincia alagad an arin man na grupo nin paraoma na kinakaipuhan dapat mag-request sa opisina nganing gabos nangangaipo matawan nin opurtunidad

Dinagdag pa kan NIA sa ngunian an Kabikolan igwa nang 60 por ciento irrigation system alagad kulang pa nin 40 por ciento nganing gabos na mga kaipuhan nin patubig aboton kan serbisyo kan ahencia.

An rehiyon saro sa may halangkaw na produksyon nin paroy asin maninigo an dugang na proyecto sa patubig nganing nakatabang sa sektor nin paraoma.