PANGAPODAN KAN MUSLIM COMMUNITY: Fondo sa rehabilitasyon sa Marawi dapat ipaliwanag
Nangapudan an Maranao Guild Solidarity (MGS) sa Ciudad nin Naga na dapat maging transparent an gobierno nasyonal kun napasain an fondo asin donasyon sa rehabilitasyon sa Ciudad nin Marawi na sagcod sa ngunian apat nang taon dai pa narerealisar.
Si Mike Mustapa, presidente kan MGS nagpahayag sa Bicol Mail na saindang suportado an kahurotan sa Duterte Administration kan Marawi Advocacy Group sa Mindanao na punan na an rehabilitasyon kan Marawi matapos kan guiera kan Maute Group asin soldados kan gobierno apat nang taon an nakakaagi.
Kan Mayo 23, 2021 iyo an ika-apat nang anibersaryo kan nangyaring guiera sa Ciudad nin Marawi.
An MGS sa Ciudad nin Naga grupo nin mga Muslim na digdi na nag-eestar asin sa Camarines Sur namumundo sa saindang mga tugang sa Marawi na sagcod sa ngunian yaon pa sa mga evacuation center mantang mayo pang estaran.
Nagkakasararo an kaparejong grupo sa pangapudan kan gobierno nin huli ta sagcod sa ngunian puros pangako matatapos nalang an termino ni Presidente Rodrigo Duterte sa 2022.
Hagad ninda an just compensation na nawaran nin kaharongan asin rulugi an sektor kan negosyante mas malala si mga pobre an padagos na nagtitirios.
Segun pa ki Mustapa an Civil Society asin iba pang organisasyon sa Mindanao na tawan man prioridad an reconstruction kan ciudad matapos kan bilyones peso na destroso na winalat matapos magsakyada sa Town Center an Maute Group kan Mayo 23, 2017 sagcod na nagkaigwa nin guiera asin kan soldados kan gobierno.
Natapos an guierra kan Oktubre kan kaparejong taon, alagad dakul pang namamanuan an apektado huli kan abalang proyekto kan gobierno sa rehabilitasyon.
Apat nang taon an Task Force Marawi kan gobierno alagad rinibo pang namamanuan kan Marawi an apektado orog na kan saindang estaran.
Igwa nang pinapatindog na mga harong dai pa maaraman kun nuarin matatapos.
Magigirumduman labi sa sangatos na residentes kan Ciudad nin Marawi an naging evacuees sa Ciudad nin Naga mantang nagdudurolag sinda sa nangyayaring madugong guiera sa saindang lugar.
Ini nangyari kan panahon ni Alcalde John Bongat na tinabangan an grupo mientras nagpapadagos pa an tension sa Marawi. (dpa)