Panghihipa gadan sa 1 pulis inako kan NPA Catanduanes

An New People’s Army sa isla kan Catanduanes nag-ako na sinda an responsable sa paghihipa sa grupo nin mga pulis kan San Miguel Municipal asin 1st Mobile Force Company sa Sitio Tucao, barangay JM Alberto na maserbe nin mandamiento de aresto sa No.1 most provincial wanted alagad nagadan kan mga rebelde an team leader.


Sa pinaluwas na pahayag ni Ka Raymundo Buenfuerza kan Febrero 3, 2022, parataram kan BHB-Bikol sa ginibo nindang opensiba kan Febrero, hinipaan kan Nerissa San Juan Command BHB-Catanduanes an sarong team kan intelligence operatives kan San Miguel MPS asin 1st PMFC sa Sitio Tucao na saindang binakbakan an tropa kan kapupulisan asin nawalat na binawian nin buhay si Police Sr. MSgt. Johnny Tiston.


Matapos kan panghihipa nag-atras an mga pulis, alagad sinabi pa sa report kan Ka Buenfuerza command saindang nabawi an duwang kalibre 38, mga bala kan 9mm asin iba pang mga kagamitan kan kapupulisan.


Naging dakulang kahapotan sa mga rebeldeng NPA kun tano ta may darang duwang kalibre 38 an mga awtoridad apesar dapat mga de kalibreng armas an saindang darang armas.


An PNP Provincial Office kan Catanduanes kinukundenar an sinambit na krimen mantang an misyon kan kapupulisan iserbe an mandamiento de aresto sa sarong suspechado na nag-aatubang nin 25 counts sa casong panlulupig.


Si Police Lt. Col.Louie Dela Pena, opisyal na parataram kan PPO Catanduanes nagpahayag na saindang kinukundenar an panghihipa mantang an misyon kan grupo bako man makipag-encuentro sa mga rebeldeng NPA.


Saiyang sinabi na sa traydor an ginibo kan mga NPA sa nagtatrabajong awtoridad laban sa kriminalidad.


Bakong makatawo an saindang ginibo apesar na mayong kalaban-laban kan bakbakan nin M-16 an mga awtoridad.