PARA SA ACTIVIDADES SA PEÑAFRANCIA FIESTA: Atubangan kan Plaza Rizal saro sa pigrerecomendar kan CEO
- Bicolmail Web Admin
- 3 days ago
- 2 min read
An atubangan kan Plaza Rizal sa centro kan Ciudad nin Naga saro sa tolong alternativong pigrerecomendar kan City Engineer’s Office (CEO) sa Sangguniang Panlungsod na pwedeng pagpilian na gigibohan kan mga actividades sa Peñafrancia fiesta.
Si Engr. Elmer Albo, Acting City Engineer kan City Hall nagpahayag kaini sa tahaw kan dai matatatapos an rehabilitasyon kan Plaza Quezon sa Septiembre 2025.
An duwa pang iba iyo an Plaza Quince Martirez asin Balatas Development Area sa Barangay Balatas.
Kinumfirmar na sa sesyon regular kan Sangguniang Panlungsod kan Department of Works and Highways (DPWH) asin kan CEO na dai kakayahon kan kontraktor na matapos an rehabilitasyon kan Plaza Quezon na matapos sa enot na target date na bulan nin Septiembre 2025 huli kaini cierto nang dai magagamit kan ciudad sa mga actividades sa Peñafrancia fiesta sa bulan nin Septiembre.
Sinabi ni Consejal Vidal Castillo, Chairman kan Committee on Infrastructure sa SP an pigdahilan kan Centerways Construction Inc. sa DPWH asin CEO huli kan pagbago kan plano na dai idadagos an pagbugtak nin ‘‘basement’’ sa sirong kan plaza mantang ciertong lalaogon nin tubig baha. Afuera pa kaini binago pa si desinyo.
An Construction firm pagsasadiri ni Lawrence R. Lubiano na may base sa Ciudad nin Sorsogon.
Natutuyawan kan ibang opisyales lokal kan ciudad maging kan media ta mabagal an patrabajo kan kontraktor
Huli kaini, an bagong administrasyon ni Alcalde Leni Robredo naghahanap nin alternativong lugar nganing gamiton para sa tradisyonal na actividades siring kan Civic asin Military Parade.
An fondo kan proyekto nagcacantidad nin Php190-M na nakunsiger ni dating alcalde asin ngunian Congressman Nelson Legacion kan tercer distrito kan Camarines Sur.
An DPWH Bicol iyo an namamahala kan proyekto bako an 3rd Camarines Sur Engineering District mantang an fondo sobra na sa Php100-M.
Comments