PATANID KAN DENR, COMELEC: Campaign materials ibugtak sa common poster area

Nagtatabang na an Department of Environment and Natural Resources (DENR) sa pangapudan kan Comelec sa gabos na mga candidato asin suportadores na ibugtak sa tamang designadong common poster area an saindang campaign materials.

Alagad an DENR Bicol sa pamamayo ni Regional Executive Director Francisco Milla, Jr. an saindang misyon asin pangapudan sa mga candidato na bawal an pagbugtak kan saindang election campaign materials sa mga kahoy.

Saiyang pinaliwanag na an pagpako nin tarpaulins sa kahoy, bako sanang nakaka-apektar sa pagtalubo asin kondisyon kan saindang salud kan kahoy alagad prohibido ini sa ley.

Hinagad kan ahencia sa mga suportadores nin candidato na haleon na an gabos na campaign materials orog na si dai pa inaabot kan operation baklas.

Kan Febrero 15, nagkaigwa na nin sarabay na oplan baklas an Comelec, kaibanan an DENR, DPWH, Bureau of Fire Protection asin Philippine National Police.

Sainda pig-enot si mga campaign materials nin mga candidato nasyonal na nagsikad na kan saindang campaign period kan Febrero 8 mantang pig-aandam an pagsikad man kan campaign period sa mga lokal na candidato sa Marso 25.

An personajes kan DENR an saindang tinataranggal iyo an mga campaign propaganda na kinarabit asin pinako sa kahoy mantang an DPWH si mga yaon sa propriedad kan gobierno arog kan tulay.

Sinabi pa ni Milla an arin man na madadakop na indibiduwal na nagpapako nin tarpaulins sa mga kahoy maatubang nin castigo base sa Acta Republica No. 3571 na mas midbid sa apod na ‘‘An Act to Prohibit the Cutting, Destroying or injuring of Planted or Growing Trees, Flowering Plants and Shrubs or Plants of Scenic Value Along Public Roads, in Plazas, Parks, School Premises or in Any Other Public Pleasure Ground.’’

Yaon pa an Section 3 kan decreto presidential 953 na nagbabawal sa pagputol, pagraot, paglogad kan mga tinanum na kahoy.(dpa)