Peñafrancia de Mayo ibabalik na kan Caceres

An pagbuelta kan actividades kan Peñafrancia de Mayo liwat ipapadagos kan Archdiocese of Caceres ngunian na Mayo 2022 matapos kan duwang taon iginilid kan simbahan huli kan pandemya.


An mayor na mga actividad ki Ina sa paagi na nin mobile procession hale sa Peñafrancia Basilica Minore na gigibohon sa Mayo 16, alas 5:45 nin hapon pasiring sa Naga City People’s Mall (NCPM) alagad sa Mayo 20, alas 6:00 nin banggui ibabalik sa estaran kaini sa Basilica.


Si Padre Louie Occiano, director kan Caceres Commission (CCOM) nagpahayag na ini an desisyon kan simbahan mantang nasa Alert level 1 na an Ciudad nin Naga.

Imahen ni Nuestra Señora de Peñafrancia nagsungko sa Naga City People’s Mall parte kan actividad sa Peñafrancia May Festival kan mga taon dai pa nagbubungkaras an pandemya. Ngunian na bulan nin Mayo 2022 liwat mabisita an Ina sa mercado publico. (Naga City Gov’t)


Alagad sa plano kan preparasyon sa festividad ni Ina sa Septiembre ngunian na taon magkakaigwa pa sinda nin pinal na pag-uurulay.


Sa lado kan manijamiento kan NCPM, si Ramon Florendo pamayo kan mercado publico nagpahayag na padagos na an saindang ginigibong pag-andam sa pagtarabangan kan mga okupantes mantang an pagbisita ni Ina sa sainda iyo man an kafiestahan sa mercado.


An Naga City Police Office mawarak man nin miembros kan PNP sa mahiwas na mercado huli kan piglalaoman na dakul an maroso nin mga devoto matapos duwang taon na suspendido an actividades ni Ina sa NCPM.


Duwang taon nawara an Peñafrancia de Mayo huli kan pandemya na iyo na an piglalanatan kan mga okupantes asin mangyayari man giraray ngunian na Mayo 2022.


Kabale sa actividades na puponan sa Sabado, Mayo 7 alas 7:00 nin aga iyo an Archdiocesan Pilgrimage na may tema: ‘‘Mary and the call towards Synodality’’ na paparticiparan kan hale sa Partido District; sa Mayo 14, alas 7:00 nin aga, Archdiocesan Pilgrimage na may tema: ‘‘Mary Communio’’ na paparticiparan kan hale sa Rinconada District.


Sa Mayo 22, iyo an 40th Dedication Anniversary of the Basilica alas 8:00 nin aga sa paagi kan pontifical concelebrated mass alagad pag-alas 4:00 nin hapon iyo an paglansar kan ‘‘Two –Year Preparatory Celebration (2022-2024) of the Centennary of Ina’s Canonical Coronation’’ sa Mayo 28, pagpadagos kan Archdiocesan Pilgrimage na may tema: ‘‘Mary and the Church Mission’’ na paparticiparan kan hale sa Central District mantang pag-alas 10:00 nin aga iyo na an confirmation.


An Naga PNP asin NCPM nagpagirumdum sa mga masungkong devoto maging mga bisita magsunod man giraray sa health protocols kan Department of Health siring kan pagsulot nin face mask. (dpa)