PI iginilid, konstruksyon kan mercado dai na ibabalyong brgy

Iginilid sa lamesa kan Sangguniang Bayan an petisyon kan maabot sa on mil na mga residente sa Pili, Camarines Sur nganing magpaapod nin People’s Initiative (PI) an mga constituentes tanganing iyo na an magpandanay kan nagkaperang resolusyon asin ordinansa na hinahagad kan alcalde sa banwaan na ini.


Alagad sinabi ni Alcalde Tomas Bongalonta Jr. dawa pendiente an PI dai marerealisar an kagustohan kan Sangguniang Bayan nganing ibalyo an ipapatindog na bagong mercado publico sa barangay San Jose.


Sinabi kan jefe ejecutivo kinumfirmar na sa saiya kan opisina rehiyonal kan Department of Public Works and Highways (DPWH) sa Bicol na dai dapat mahahale sa orihinal na plano an ikokunstruhir na mercado publico sa barangay Old San Roque.


An punto babasehan man giraray si alokasyon kan Php240 milyon na hale sa orihinal na inaprubaran kan Department of Budget and Management.


An gusto kan mayoriang miembros kan SB ibalyo sa barangay San Jose sa lote kan Capitolyo Provincial sa dating Bicol River Basin Development Program nin huli ta iyo an dikta sa mga consejal kan saindang ‘‘among sa politica kan capitolyo’’, sabi pa ni Bongalonta.


Hinahalat nalang kan lokal na gobierno an pighahaman na plano kan DPWH Bicol na kinababalehan kan desinyo, na dapat igwang basement, igwang premiro asin ika-duwang escalon.


An saro naman sa posibleng maka-ulang na iyo an resolusyon kan SB sa pag-demolished kan lomang edificio kan mercado alagad kun delicado na an edificio asin mapeligro na sa publico dapat igwang certificasyon an DPWH asin dai na digdi kaipuhan an resolusyon kan consejo lokal.


Perming tagulnod an mayoriang miembros kan SB sa administrasyon ni Bongalonta huli ta bako niyang kaalyado sa politica envez an nagsusuporta sana sa saiya iyo sinda consejal Narcel Lopez asin Francis Belen alagad sinabi man ni Consejal Efren Amesola na sa tama sana an saindang ginigibo kun igwang mga pagcontra sa jefe ejecutivo.


Nagkaperang mga resolusyon na hinahagad kan jefe ejecutivo sa SB alagad perming binabasura kan mga consejal.


Nin huli kaini, digdi nagpuon si hiro kan namamanuan sa mga barangay nganing itulod an People’s Initiative. (DPA)