Problema sa right-of-way tagulnod sa BBB ni DU30

An inaatubang na problema sa ‘‘acquisition of right-of-way’’ sa mga apektadong kagrogaring nin daga iyo an isyu sa pagkakaabala kan mga Build-Build-Build program ni Presidente Rodrigo Duterte sa Bicol.

An mga darakulang proyekto iyo an modernisasyon kan Philippine National Railways (PNR) asin Quezon-Bicol Expressway na parejong bilyones pesos an cantidad sa proyekto.


Ini an mga pahayag ni Undersecretary Marvel Clavecilla, Presidential Assistant for Bicol Affairs, alagad piglalaoman na ipapadagos kan masunod na administrasyon mantang igwa nang nakatagamang mga fondo.


Dawa siisay an ganador na Presidente sa maabot na eleksyon nasyonal asin lokal sa Mayo 9, 2022 an Department of Transportation (DOTr) asin Department of Public Works and Highways (DPWH) ipapadagos an sinambit na mga proyekto, sabi pa ni Clavecilla.


Pirmado na kan DOTr an Php142-bilyon na contrata sa joint venture kan China Railway Group Ltd. China Railway No. 3 Engineering Group Co. Ltd. asin China Railway Engineering Consulting Group Co. Ltd. mientras nagsikad na an proyekto sa enot na 380 kilometros.


Digdi sa Bicol kan mga nakaaging bulan sunod-sunod na an mga ginibong survey sa pagbagong ruta kan relis kan ferrocaril.


Sa listahan kabale sa mga stations kan 380-kilometros PNR South Long Haul


(Banlic-Daraga, Albay), Laguna; Banlic, Bucal Los Baños, San Pablo, Provincia kan Quezon, Candelaria asin iba pa.


An PNR-Bicol igwang laba nin 565-kilometer railway, na masumpay Metro Manila sundo sa Southern Luzon provinces abot sa Sorsogon asin Batangas.


An modernisasyon kan PNR sa premiro pa sanang taon sa termino ni Duterte nagseguro na madadagos an bilyones pesos na proyekto alagad perang bulan palang nagpupuon pa sana sagcod na maghelig sa Malacañan an presenting administrasyon dai matatapos alagad huli ta igwa nang fondo dapat dagos-dagos an proyekto dawa siisay an masunod na Presidente kan nasyon., sabi pa.


Sa DPWH, pinahayag na an Quezon-Bicol Expressway nagpuon na sa Calamba, Laguna alagad nakaka-ulang iyo an nagkaperang mga problema sa ‘‘acquisition of right-of-way’’ sa aagihan kan proyekto.


An gobierno nag-alokar nin Php700 bilyon para sa kontruksyon kan 220 kilometros na QueBex na bagong ruta asin mapalipot kan viaje Manila-Bicol.


An mga banwaan na aagihan base sa listahan kan DPWH iyo an mga minasunod: Pagbilao, Padre Burgos, Gumaca, Lopez, Calauag asin Tagkawayan, gabos sa provincia nin Quezon, asin Lupi, Pamplona asin San Fernando sa Camarines Sur.


An dakulang proyekto na pigpadagos ni Duterte iyo an Bicol International Airport sa Daraga, Albay na ngunian operational na mantang piglalaoman tugotan na kan national IATF para sa international flight oras na magparababa na an caso kan Covid-19. Dakulang bagay ini sa turismo na hinahalat kan Department of Tourism sa Bicol. (dpa)