Produksyon nin bagas sa Bicol halangkaw dawa El Niño - DA

Pili, Camarines Sur --- Pababa na an presyo kan suplay nin bagas sa mga mercado sa tahaw kan piglalaoman na 600,000 metrico toneladang paroy an produksyon sa Kabikolan mantang aranihan ngunian na bulan nin Marso 2024.

Kun icoconverter sa bagas o momonilohon igwang 400,000 metrico tonelada dugang na suplay nin bagas sa rehiyon Bicol, sabi ni Department of Agriculture Regional Spokesperson Luvilla Guarin.

An halangkaw na produksyon dawa panahon nin El NiÑo nakataruk paroy nin amay an mga paraoma kan Deciembre 2023 na inabot pa si katubigan sa kaomahan huli kan padagos na pag- uran bitbit kan ‘‘shear line’’.

Halangkaw na an presyo kan paroy sa pribadong kumprada na 27 pesos kumpara sa National Food Authority cantidad sanang 23 pesos cada kilo.

Sa report kan Philippine Atmospheric and Geophysical Astronomical Services Administration (PAGASA) piglalaoman na mabagsak sana nin mga pag-uran sa Bicol nin 100 millimeters alagad nadoble sa 200, resulta kaini dakul nakataruk paroy mantang sa iba dai na huli sa tubig baha siring kan nangyari sa Camarines Norte asin Masbate na apektado kan ‘’shear line’’.

Sa 5,000 na piglalaoman na apektado kan El Nino 3,000 hektarya an natarukan mientras na si 2,000 hektarya inabot tubig baha.

Sinabi pa ni Guarin nagpoon si aranihan kan Febrero, Marso asin matatapos sa Abril alagad igwa pang mahabol sa Mayo ngunian na taon.

An DA Bicol bulan pa nin Hunyo 2023 nagpaluwas nang patanid sa mga paraoma sa rehiyon mientras na matubig pa an kaomahan huli padagos na mga pag-uran dara kan ‘’shear line’’ dapat magtaruk nin amay nganing dai aboton kan El Nino phenomenon.

PANAHON ARANIHAN. Paraoma sa Barangay Planza, San Fernando, Camarines Sur nagbubonag kan bagong anihon na paroy sa gilid nin tinampo. (retrato kua ni Jun Collantes)