‘‘Repeat teenage pregnancies’’ nakaka-alarma na - CPNO

NaaAlarma na an Ciudad nin Naga sa paglangkaw kan caso sa ‘‘repeat teenage pregnancies’’ alagad si dating numero kan mga nagbados na nag-eedad nin 19 anyos pababa dai na naglangkaw.

Si Ray-An Cydric Rentoy, jefe kan City Population and Nutrition Office (CPNO) kan lokal na gobierno kan Ciudad nin Naga nagkumfirmar sa Bicol Mail na ‘‘alarming’’ na an nangyayaring ‘‘repeat teenage pregnancies’’ mantang an Barangay Concepcion Pequeña iyo an may halangkaw na caso sa 27 barangay kan ciudad.

Sinabi kaini sa taon 2022, igwang total nin 264 na ‘‘repeat teenage pregnancies’’ 202 mga ‘‘first timers’’ asin 62 mga ‘‘repeat pregnancies’’ alagad sa ngunian sainda nang tinututokan an caso.

Inaatubang an mga menor de edad nganing saindang paliwanagan sagcod na matabangan nganing dai na maglangkaw an caso. An mga Barangay Health Workers (BHW) katuwang kan CPNO alagad an dakulang bagay sa sainda iyo an Barangay Service Point Officers (BSPO).

Pigtutulod ni Rentoy na dating Sangguniang Kabataan Federation President asin Ex-Oficio member kan Sangguniang Panlungsod (SP) na maging katuwang ninda an Department of Education (DepEd) nganing itukdo an negatibong epekto sa amay na pagbabados.

Enot nang sinabi kaini, an kabali sa mga causa iyo an pagtios, problema sa familia asin kulang sa edukasyon.

An CPNO igwa nang ahencias na ka-partner na may programa na mapababa an caso sa amay na pagbarados kan mga menor de edad.

Sa sesyon regular kan SP kan Martes, Febrero 21, 2023 sa privilege speech ni Consejal Gayle Abonal-Gomez saiyang tinawan doon na nakaka-alarma na an mga caso sa teenage pregnancies.

Kan taon 2019 pigdeclara kan gobierno nasyonal an ‘‘national emergency’’ huli sa caso sa mga amay nagbabarados na menor de edad.

Saiyang sinabi na sa pag-aadal igwa nang 62 por ciento kan mga jovenes amay nagiging ina sagcod na-drop sa saindang pag-escuela, kabali sa dahilan iyo an pagtios, kulang sa edukasyon asin problema sa familia.

An consejal nagsabi na nakatalaan siyang magsunad nin ‘‘proposed ordinance institutionalizing the adolescent and youth sexual and reproduction health program to prevent and respond to teenage pregnancy in Naga City’’. (DPA)