Road widening project sa M.T. Villanueva tataposon sa Hunyo

Canaman, Camarines Sur --- Tataposon na an patrabajo sa Hunyo 2021 kan kontratista kan Camarines Sur 3rd Engineer District kan Department of Public Works and Highways (DPWH) sa road widening project kan M.T. Villanueva, Avenue, Ciudad nin Naga mantang sa ngunian yaon na sa 98 por ciento an acomplisimiento kan proyekto.


Alagad may nawalat na limang propriedad na sadiri kan bestadong mga familia na nag-aatubang na nin expropriation case na sinangat kan DPWH huli ta nagsasayumang magpagaba kan saindang estractura na apektado kan proyekto.


Ini an mga pahayag sa Bicol Mail ni Assistant District Engineer Richard Emmanuel Ragragio kan DPWH mantang inabot nin tolong taon an proyekto sa tahaw kan nagkaperang familia na dai nag-cocooperar sa obras publica nganing mahale an mga ulang na estractura.


Afuera pa kaini, segun ki Ragragio an pangako kan Camarines Sur II Electric Cooperative (Casureco II) na haharalion na an nakakaulang na poste na yaon sa laog kan road right of way sagcod sa ngunian dai matapos-tapos.


Sa paliwanag kan Casureco II, sinabi kan saindang spokesperson Rinner Bucay na igwa na sindang mga hinaraling poste na ulang sa tinampo alagad makakalaog sa pribadong propriedad na pendiente sa jusgado an expropriation case na sinangat kan obras publica.


Bako sanang poste kan cooperativa nin electricidad an mga nakakaulang sa pinahiwas na tinampo alagad si mga pinatindog na sadiring poste kan telcos an sagcod sa ngunian dai pa nahahali.


An proyekto kan DPWH makakatabang sa problema sa trafico sa M.T. Villanueva Avenue. (DPAureus)