SA BRGY DUMAGMANG, LABO, CN: Tallado dapat maghiro na sa reclamo kan mga residentes

Nag-aapelo na nin tabang an mga residente kan Barangay Dumagmang, Labo, Camarines Norte sa gobierno provincial nin huli kan harassment na ginigibo sa sainda kan kapupulisan na nakadestino sa Kampo kan PNP sa kaparejong barangay mala ngani napiritan na mag-evacuar an 52 na mga familia sa saindang mga harong kasunod kan permi nalang sinda nakakadangog nin putok nin badil sa kampo kan PNP.

Si entrevista ki Jesus Mangampo sa ngaran kan saindang pag-iriba na apektado kan mga harassment kan awtoridad, hagad na ninda an tabang ni Gobernador Edgar Tallado na dapat maheling man an saindang kamugtakan bako permi nalang yaon sa aircondition na opisina kan Capitolyo.

Nagtutubod sinda na kaipuhan na digdi maghiro an opisyales kan Capitolyo Provincial kan Camarines Norte mantang cuestionable sa sainda an pagkakagadan kan duwang sibilyan na pig-aakusaran na miembros kan NPA na nakua nang nag-aagnas na bangkay kan Marso 24 na pigbistong sinda Luis Vinavinte Jr. 55 anyos asin Jet Lee Vinavinte, 22 anyos nag-eerok sa brgy. Dumagmang.

Enot kaini, kan Marso 19, 2021 nagkaigwa nin encuentro an NPA asin kapupulisan na nagresulta sa pagkakagadan kan limang pulis asin duwang iredo.

Alagad sa pirmadong report kan opisyales de barangay, sinabi ni Kgd. Anazario Carilla kan Marso 21 mga alas 3:00 nin hapon naheling niyang nagbakal pa nin sirang bangus sa saiyang tindahan si Luis Vinavinte Jr.

Sa pahayag man ni Kgd. Julieta Dela Cruz kan Marso 21, 2021 mga alas 3:40 nin hapon naheling niya asin nag-osipon pa na inabot sinda nin takot sagcod nagdapa sa laog kan saindang harong.

Pig-osipon pa kan Sabadong aga, Marso 20, 2021 kinaulay siya kan mga pulis asin sinabihan na may ‘‘masugod pala na kalaban ay diman lang sila sinabihan’’ sabi pa kan pulis nag-agi palan sa saindang harong an mga NPA.

Pinatanidan pa siya kan mga pulis na mayong magluwas sa harong para magpa-centro, alagad nagpirit lang siyang magluwas nganing magbakal nin kakanon.

An statement na ini parte pa kan pirmadong pahayag ni Kgd. Julieta Dela Cruz asin pirmado ni PB Arnulfo Jalimao asin pitong miembros kan barangay council.

Sinabi ni Mangampo, afuera kan mga insidenteng ini maging siya biktima mala ngani kabale sa maabot sa 15 mga residente kan barangay na fuersahan sinugo na tangalon an makina kan ball mill sagcod na fuersahan na pigpalonad sa trak nganing darahon sa Malasugue, sa PNP Labo na dagos na nilaog sa carcel hasta kinasohan sinda nin illegal mining.

Segun pa saiya na sarong pulis an nagkurahaw ‘‘Sasakay ba kayo o hindi’’ ang sigaw ng isang pulis, sabay hawak sa kanyang baril, natakot kami kaya’t napilitan kaming sumakay sa trak, natakot din ang aking (Edwin) mag-ina kun saan kami dadalhin ng mga pulis, kaya’t sumakay din sila sa trak’’.

Magabat sa daghan ninda kan papirmahon na dai man nag-aaram kan caso.

Inabot sinda nin perang aldaw sa carcel kan Police Station asin nakaluwas sana kan makapiyansa nin tig-3,600, sabi pa.

Nagdulok na sinda sa barangay council nganing hagadon sa LGU Labo na mag-atubang sinda sa dialogue entre kan PNP, DILG asin iba pang ahencia kan gobierno tanganing matabangan sinda asin makabalik sa dating estaran.

ILEGAL NA PAGMINA HAGAD IPAPUNDO-PNP

Pigrerecomendar na kan PNP na dapat ipapundo na kan DENR an mga illegal mining sa Camarines Norte.

An aksyon kasunod kan report ni Major Albert Igantius Ferro kan CIDG matapos makakumfiscar sinda nin mga gamit sa paggibo nin improvised explosive devices (IEDs) na ginamit kan NPA sa nangyaring encuentro sa Brgy. Dumagmang.

Nakumfiscar an mga materiales sa paggibo nin IEDs hale sa illegal mining sites kan mga residentes para sa saindang small-scale backyard gold mining activities.