SA CIUDAD NIN NAGA: BHWs katuwang kan DOH sa‘‘Chikiting Ligtas Vaccination’’

Matapos ilansar na kan Department of Health an ‘‘Chikiting Ligtas Vaccination’’ mahiwas an participasyon kan mga Barangay health Workers (BHWs) sa 27 barangay kan Ciudad nin Naga nganing hagadon sa mga magurang na pabakunahan bilang proteksyon sa saindang salud.

An bakuna contra sa Polio, Rubella, asin Measles na pigponan na an vaccination activity sa SM City asin ini madurar hasta sa huring semana ngunian na bulan nin Mayo.

Sa entrevista kan Bicol Mail ki Consejal Sonny Rañola, Chairman kan Committee on Health sa Sangguniang Panlungsod sinabi kaini na dakulang bagay an mga BHWs sa programang ini kan DOH para sa kaligtasan kan mga ‘‘chikiting’’.

An BHWs iyo an nag-house-to-house nganing paaramon an mga magurang sa programa sa libreng bakuna poon sa nag-eedad nin 0-59 bulan (bakuna laban sa polio) asin 9-59 bulan (bakuna laban sa measles asin rubella).

Yaon man an vaccination teams na iyo an naglilibot sa cada barangay.

Sinabi pa ni Rañola na an pagbabakuna sa mga kaakian importanteng marhay para sa proteksyon sa salud alagad dapat magkooperar an mga magurang na iluwas an saindang mga aki para mabakunahan.

An DOH sa pamamayo ni regional director Ernie Vera enot nang naglibot sa mga ciudades asin provincia sa Kabikolan nganing mag-atubang sa symposium tanganing maandaman an programa sa pagbabakuna sagcod sa katapusan ngunian na bulan.

Target kan DOH na matudokan nin bakuna iyo an maabot sa 1.2 milyon na mga aki. (dpa)