SA COMELEC NAGA: Listahan kan registered voters kayang iluwas antes kan Agosto 1

Kakayahon kan Commission on Elections (Comelec) sa Ciudad nin Naga nganing saindang iluwas an listahan kan registered voters para sa nakatalaan na eleksyon sa Oktubre 30, 2023 sa Barangay asin Sangguniang Kabataan (SK) antes kan Agosto 1, 2023.

Si Abogado Maico Julia Jr. Election Officer sa Ciudad nin Naga nagpahayag sa Bicol Mail na padagos an saindang pagserne kan mga votantes na rehistrado cada barangay bilang pag-andam sa maabot na eleksyon.

An Comelec Commissioners nagpaluwas nang directiva sa local Election Registration Board (ERBs) na dapat kumpletohon an mga verification para sa Election Day Computerized Voters Lists (EDCVLs) asin Posted Computerized Voters Lists (PCVLs) antes kan Hulyo 27.

An posting kan listahan nin mga votantes dapat ilaag sa Opisina kan Election Officer asin sa bulletin board kan cada ciudad/municipal hall.

Nagtutubod an Comelec kan ciudad na kakayahon ninda an posting kan verified asin certified EDCVLs and PCVLs antes kan Agosto 1, 2023 mantang an Naga igwa sanang total na 122,009 na rehistradong votantes.

Pinal na an resolusyon kan commission an pagsangat nin certificado de candidatura sa Agosto 28 hasta Septiembre 2, 2023, sabi pa ni Julia.

Bako nang bago sa mga paratukdo an computerized elections mientras perang eleksyon na an nakaagi aram na ninda an dalagan asin piglalaoman matatapos nin amay an resulta kan eleksyon huli ta Brgy asin SK sana an mga candidato.

Igwa nang maabot sa 1,000 paratukdo an maserbe bilang mga electoral board members sa 329 precinto sa ciudad para sa nagdadangadang na eleksyon sa Oktubre 30.

Dinagdag pa ni Julia tolong bulan antes kan election period, an Comelec preparado na an 329 mga classrooms na ookuparon bilang voting precincts sa aldaw kan pirilian. An pirilian mabukas alas 7:00 nin aga hasta alas tres nin hapon base sa pigmamando kan Comelec. (dpa)