SA DEPED KAN CIUDAD NIN NAGA: Isyu sa learning poverty sa elementarya nakakabangon na

Nagdidikit nalang an mga nasa grade I hasta IV sa elementarya kan Department of Education (DepEd) sa Ciudad nin Naga na nasa listahan kan mga nadidificilan pang makabasa kasunod kan mga ginibong interbensyon kan ahencia matapos kan pandemya.

Si City School Superintendent Susan Collano kan DepEd sa ciudad nagpahayag na base sa saindang estatistika maabot pa sa 490 na mga pupils sa sinambit na mga grado an padagos nang hinahasa nganing makabangon sa saindang problema.

Afuera kaini, pig-eenganyar kan opisyal kan ahencia na dapat magbalik an estudiantes sa mga pagbasa nin libredo maging iba pang reading materials siring kan peryodiko lokal asin nasyonal envez na mag-asa sa mga research sa gadget.

An nangyayari sa ngunian dawa magurang nagdedepende nalang parati sa gadget.

Alagad an ibang mga paratukdo sa escuelas publica sa Camarines Sur na nagsayuma nang magpamentionar kan saindang pangaran nagpapahayag na dakul pang mga nasa elementary level abot sa grade VI nadidificilan pang makabasa.

Magigirumduman sa pinaluwas na report kan World Bank kan nagtalikod na taon an satong nasyon saro sa mga may halangkaw na rate sa ‘‘learning poverty’’ sa East Asia asin Pacific region.

Maging si Bicol DepEd regional director Gilbert Sadsad nagpahayag na igwa na sindang programa tanganing resolberan an isyu sa learning poverty na pinaluwas kan WB.

Magigirumduman sa ginibong committee hearing kan Committee on Education sa Camara-Baja an bagay na ini saro sa napuntohan ni Camarines Sur 3rd District Congressman Gabby Bordado Jr. kan saiyang cuestionon an opisyal kan ahencia kun ano an saindang mga ginigibong programa sa sinambit na isyu nasyonal.

Sinabi sa datus kan World Bank na sa diez anyos, siyam sa cada sampolong Filipino nadidificilan pang magbasa dawa simpleng tataramon. An sinambit na edad si mga nasa grade IV pupils, sabi pa ni Bordado.

Igwa man na mga experto sa edukasyon na saindang pigrerecomendar gibohon nang abot sa grade VI an pagtukdo nin mother tongue poon sa kindergarten hasta sa kaparejong grado.

Sinabi pa kan representante kan tercer distrito kan Camarines Sur masupog na kun arog kaini sa Filipinas dapat resolberan kan ahencia.

Alagad sa DepEd kan ciudad nin Naga luway-luway nang nakaka-angat an apektadong aki sa elementarya huli kan saindang mga interbensyon.

An ciudad igwang total na 72,000 na enrolees sa pribado asin pampublicong escuelahan na igwang dugang na tres mil boot sabihon naglangkaw matapos kan pandemya.

MAGBASA --- Mga elementary pupils kan Pacol Elementary School sa Ciudad nin Naga kun bakante an oras sa klase yaon sa Raul S. Roco Extension Library kan City Hall nganing nagbasa nin libredo maging peryodiko lokal dagdag pa sa saindang kaaraman. (dpa/era)