SA DUGANG NA TARIFA SA TUBIG: Pagnombra nin bagong LWUA Chairman naigilid an petisyon

Naging paborable sa consumedores kan Metropolitan Naga Water District (MNWD) kan Ciudad nin Naga an pagnombra ni Presidente Ferdinand Marcos Jr. kan Mayo 26, 2023 kan bagong Chairman kan board sa Local Water Utilities Administration (LWUA) na naging pendiente an pagpaluwas nin desisyon kan dugang na tarifa sa tubig kan water district.

Nagpalyar na maparikas an urulay sa agenda sa bagong water rate increase kan mga water district kabale na an MNWD mantang dai pa maaraman kun nuarin an masunod na miting kan Board of Trustees (BOT) sa liderato kan bagong nombrahan na Chairman.

Si Acting General Manager Florencio Mongoso Jr. nagsabi sa entrevista kan Bicol Mail na mayo pang asegurasyon an BOT na maaprubaran tolos an resolusyon kan junta kan MNWD sa hinahagad na water rate increase na P35.00 sa dating tarifa P125.00.

Kun susunodon sa polisiya kan LWUA cada tolong taon puedeng maghagad nin dugang na tarifa an mga water district alagad an MNWD maabot na sa sampolong taon dai nag-iimplementar nin bagong dugang na tarifa sa tubig.

Kan Enero 2023 ginibo si public hearing kan MNWD sa cada municipio na saro sa proceso antes isumiter sa LWUA nganing aprubaran kan BOT, alagad nagpalyar na maaprubaran nin amay.

Kan nagtalikod na administrasyon nakasapog sa controvercial na pagkakalugi an water district huli kan ‘‘mismanagement’’ asin kabale ini sa dahilan nganing mag-petisyon sa LWUA sa water rate increase.

Dinagdag pa ni Mongoso sa ngunian poon kan Enero hasta Abril 2023 positivo na sa P3.3-M an manijamiento.

Luway-luway sindang nakabangon finansyal huli kan mga ginibo niyang higot paja sa gastos sagcod na hinarale si mga job order employees na igwang duplikasyon sa trabajo kan ibang regular na empleados. (dpa)