SA DUMAGMANG ENCOUNTER: Familia kan mga biktima hagad patas na inbestigasyon

Napapanahon an aksyon kan PNP na nagbilog nin Special Investigation Task Force Dumagmang nganing aramon kun may paninimbagan an arin man na opisyal kan 2nd Provincial Mobile Force kan PNP Provincial Office kan Camarines Norte sa nangyaring ‘‘Dumagmang Encounter’’ kan Marso 16.


An familia kan mga biktima naglalaom sa resulta kan inbestigasyon nganing matawan justicia an saindang mahal sa buhay.


Si Regional Director Brig. General Bartolome Bustamante kan Bicol PNP nagpahayag na pigcrear an task force para maaraman kun igwang kapabayaan nganing atubangon an ano man na puedeng penalidad laban sa responsableng opisyal kan PNP.


An limang mga binawian nin buhay iyo sinda Cpl. Joey Cuarteros kan Ciudad nin Tuguegarao, Cpl. Benny Ric Bacurin kan Brgy. Guinacutan, Vinzon, Camarines Norte, Sgt. Roger Estoy kan Bagumbayan, Libmanan, Camarines Sur, Cpl. Jeremy Alcantara kan Uson, Libmanan, Camarines Sur, asin Cpl. Alex Antioquia kan Colacling, Lupi, Camarines Sur.


An duwang iredo iyo sinda Cpl. Eric Hermoso asin Patrolman Aldrin Aguito, parehong taga Camarines Sur.


An Armando Catapia Command kan CPP/NPA sa Camarines Norte nag-ako na kan saindang panghihipa sa mga awtoridad.


An mga mahal sa buhay kan mga binawian nin buhay sa encuentro nagpahayag kan saindang sentimiento na dapat matawan nin justicia an pagkakagadan kan mga biktima.


Si Jaime Alcantara, ama ni Cpl. Jeremy Alcantara nagpahayag na tama sana an desisyon na magbilog kan task force nganing maaraman kun igwang kapabayaan an PNP asin Philippine Army huli ta mayong reinforcement sa encuentro.


Sinabi pa an insidente nangyari alas 9:25 Viernes na banggui kan Marso alagad Sabado nin aga, nag-abot an reinforcement.


Kun naka-responde tolos posibleng si may tama na nin bala puede pang pigdalagan sa hospital na buhay pa, sabi pa kan ama.


Si Cpl. Alcantara, pigbuyagyag pa na iyo si ‘‘last standing man’’ sa encuentro.


Dakulang kahapotan pa apesar igwang Army Detachment sa Brgy. Dumagmang, Labo, Camarines Norte mga 500 metros an distancia sa nangyayaring bakbakan kan PNP asin NPA alagad mayo lamang nin reinforcement.


An sabi pigbobomba na kan PA kaya ngani huri nang nag-abot an reinforcement sa PNP.


Si Rhon Antioquia, tugang man ni Cpl .Antioquia nagpahayag sa media na kun naka-reinforce an PNP o Phil. Army puedeng igwa pang inabotan nin buhay.


Posibleng naagapan pa si buhay kan mga biktimang pulis, alagad nagpabaya, sabi pa.