SA DUWANG SEMANANG OPERASYON KAN LTO SA BICOL: 500 na mga motorista pig-isyuhan TOP tickets

Naikurit sa 500 na mga motorista sa Bicol na isyuhan nin temporary operator’s permit (TOP) kan Land Transportation Office huli sa traffic violations sa ginibong regional operations kan law enforcers poon kan Septiembre 6 hasta Septiembre 18, 2023.

Kabali sa mga na isyuhan nin TOP ticket siring kan nagmamanijo na mayong lisensya, dai rehistrado an vehiculo, mayong ilaw, dai naggagamit helmet asin iba pa. An multa poon sa P1,000 hasta P5,000.

An ginibong operasyon sa panahon kan kasiribotan sa Peñafrancia fiesta mantang mahibog an bulos nin trafico palaog asin paluwas sa Ciudad nin Naga magin sa Camarines Sur.

Alagad sa 500 na isyuhan nin TOP ticket na mga violators an 200 digdi hali sa Naga, sabi ni Naga LTO District Officer spokesperson, Eric Torrecampo.

An lakdang kan ahencia nganing maseguro na nagsusunod sa codego sa trafico an mga motorista kabali na digdi an seguridad kan tsuper maging kan pasajeros.

Nagpatanid man an LTO na magpapadagos pa an saindang mga suprisang operasyon bako lang kun panahon na may kafiestahan sa sarong lugar.

Duwang mga traffic violators pig-iisyuhan nin TOP ticket kan LTO law enforcers. (LTO FB page)

TSUPER KAN SUV NA NAG-ARADO SA 17 MGA VEHICULO SA NAGA PINAPALIWANAG KAN LTO BICOL

An Land Transportation Office sa Bicol tolos nag-isyu nin Show Cause Order (SCO) sa tsuper asin sa kagsadiri kan vehiculo na parejong taga Ciudad nin Naga na envuelto sa road crash sa ciudad.

An tsuper nagprubar pang magdulag alagad nadakop man giraray pigbisto kan Naga City Police Office na si Jeferson Mariano, 27-anyos asin nakaluwas sa carcel kan Septiembre 17 matapos makabayad nin fiyansa.

Sa LTO FB page, si regional director Francisco Ranches Jr. nagpahayag an SCO pinaluwas kan Septiembre 15 na pigserbe kan operations division sa envueltong tsuper asin kagsadiri kan SUV.

An LTO Bicol nagsabi pa na tolos sinda nag-isyu nin preventive suspension sa tsuper sa laog nin 90 diyas saka dapat siyang mag-atendir sa hearing kan adjudication board sa Septiembre 21 sa opisina rehiyonal nganing magpaliwanag alagad kun magpalyar mag-atubang sa pigtalaan na hearing mas magiging magabat an castigong revocation kan lisensya.

An aksyon kan ahencia sarong patanid sa mga motorista na bakong kaako-ako an ginibo kan pasaway na tsuper.

An mga caso na saiyang inaatubang iyo an reckless imprudence, improper person to operate motor vehicles asin pagbalga kan section 55 kan RA 4136. (dpa)