SA HURING CUARTO, SABI: Modernisasyon kan BMC naghahalat nalang fondo

Kinumfirmar ni Dr. Francisco Sales III, jefe kan Bicol Medical Center (BMC) ki Congresista Gabriel H. Bordado Jr. kan tercer distrito kan Camarines Sur na nakatalaan mag-abot sa huring cuarto ngunian na 2021 an dugang na maintenance and other operating expenses (MOE) kan hospital para sa dugang na mga item sa mga doctors, medical technologist, asin nurses gustong sabihon igwa nang resulta an saiyang pig-padrenohan na BMC Modernization Act na inaprubaran ni Presidente Rodrigo Duterte kan nakaaging taon.

An Republic Acta 11478 o mas midmid sa BMC Modernization Act iyo na an pag-implementar sa 1,000 bed capacity hale sa dating 500, upgrading kan service facilities and professional health care services.

Alagad dai paman pigdetalye ni Dr. Sales ki Diputado Bordado kun pera an nakatalaan na mag-abot na fondo asin dugang na personajes kan BMC.

Nagtutubod an BMC na an abalang dugang na fondo huli kan krisis sa salud mantang pigtatawan prioridad kan gobierno nasyonal an Covid-19 response.

Makakatabang sa BMC an dugang na doctors asin nurses sa tahaw kan dai pa nagkukulpa an caso kan coronavirus disease (Covid- 19) sa Ciudad nin Naga asin Camarines Sur maging iba pang provincias kan Kabikolan.

An eight storey building asin duwa pang mga bagong edificio kan BMC nagagamit na alagad an problema kakulangan personajes.

Edificio kan Bicol Medical Center.

An RA 11478 narealisar matapos padrenohan ni Bordado an bill alagad saiyang piglinaw na kan Septiembre 21, 2018 durante kan 17th Congress, nagsangat siya kan HB No. 8276, an kaparejong bersyon kan HB 831, na na-aprubaran sa ika-tolo asin pinal na pagbasa sa Camara-Baja.

Alagad perang aldaw nalang antes kan congressional break, kaya imposible naman urulayan sa senado an HB 8276.

Huli kaini an HB No. 8276 na aprubaran sa third and final reading sa 17th Congress, an approval liwat pig-file an bersyon, HB 831, sa paghidale sa 18th Congress, sabi pa ni Bordado.

Saiyang pigpresentar an HB No. 831 sa senado kan Febrero 12, 2020 na sinuportaran ni Dr. Sales.

Napag-araman na si Diputado LRay Villafuerte kan segundo distrito kan Camarines Sur nagsabi man na bako sanang si Bordado an nagtulod kan bill bilang deputy speaker for finance asin nasa mayoria sinda narealisar nganing maaprubaran an bill.

Si Senador Kiko Pangilinan (LP) iyo man an nag-file sa senado sagcod na dagos nang inaprubaran ni Presidente Duterte. (dpa)