top of page

SA KOMPLIKTO KAN ISRAEL HAMAS: Pederasyon nin mga Muslimsa Bicol nangangadie vs giyera

An grupo kan United Muslim Communities in Bicol (UMCB) na igwang labi sa diez mil na miembros sa anom na provincia kan Kabikolan nagpahayag an saindang ginigibo sa ngunian iyo an pagpangadie na dai mahulog sa World War III an nangyayaring komplikto sa pag-ultanan kan Israel asin Hamas na ribo-ribo na an nagkaka-garadan saka iredo.

Mawot ninda na magkaigwa nin ceasefire huli ta ribo-ribo na an apektado mahiwas na an destroso sa giyera.


Nagdadakul nang grupo nin mga Muslim sa manlaen-laen na nasyon an naglalansar nin mahiwas na protesta nganing suportaran an Palestine mantang namumundo an saindang kapuwa Muslim sa Filipinas alagad an UMCB iginilid an plano na maglansar man nin protesta envez magpangadie na matapos na an giyera.


Ini an mga pahayag sa Bicol Mail sa entrevista ki Mike Mustapa, vice president for external affairs kan UMB sa tahaw kan nagpapadagos na pambobomba kan Israel sa Gaza, Palestine.


Perang veces nang nagtitiripon an pederasyon kan Muslim sa Bicol na an mayor na tema para sa katuninongan kan nasyon, sabi pa.


Apektado an mga kaakian, gurang maging mga sibilyan kan biglang magsilyab an giyera, sabi pa ni Mustapa.


Sinabi pa kan lider kan Muslim sa Bicol na saindang sinusuportaran an pangapodan kan Arab group na magkaigwa kan tolos-tolos na ceasefire nganing tugotan makalaog an United Nations Humanitarian Services na madara nin suplay nin mga pagkakan, bulong, asin iba pang mga kaipuhan kan maabot sa dos milyones na tawo sa Gaza asin maisalbar an saindang buhay.


An aksyon kan Arab countries kasunod kan participasyon kan milyon-milyon na mga Arabo sa Mass Prayer bilang pagpaheling nin suporta sa Palestine. (dpa)

Mosque kan Muslim Community sa Ciudad nin Naga saro sa may grupo nin mga Muslim sa Kabikolan nangangadie na maresolberan asin matapos na an giyera kan Israel asin Gaza, Palestine para sa katuninongan kan kinaban. Mawot ninda na magkaigwa nin peace talk para sa gabos. (MM/DA)

Commentaires


bottom of page