SA PAGPATUDOK BAKUNA: Rañola, insperasyon kan senior citizens
Luway-luway nang na-iintindihan kan mga senior citizens sa Ciudad nin Naga kun tano ta dapat sinda magpabakuna laban sa nakakagadan na coronavirus disease (Covid -19) alagad an saindang insperasyon nganing magpatudok iyo si Consejal Sonny Dr. Rañola, saro nang senior citizen.
Si Liga ng Barangay President asin ex-officio member Antonio Beltran kan Sangguniang Panlungsod nagsabi sa pinaapod nindang miting sa maabot sa sanggatos na miembros kan SC haros mayoria an mga ‘‘undecided’’ sa pagtubod na igwang negativong epekto sa saindang salud oras na ma-ineksyonan.
Alagad sa ginigibong paliwanag kan Liga asin ni City Health Office Dr. Vito ‘‘Butch’’ Borja nagbabaliktad kan saindang pagtubod mantang saindang pighalimbawa si Dr. Rañola na nag-eedad na ngani nin 80 anyos kan matudokan nin bakuna dai man nakamate nin negativong epekto sa salud.
An SC iyo an isusunod na bakunahan oras na mag-abot na an suplay kan Astrazenica vaccines na iyo an babakalon kan City Hall.
Sa mga survey kan Barangay Health Workers (BHW) sa 27 barangay kan ciudad mayoria sa mga SC an mga ‘‘undecided’’. Huli kaini, nagtarabang-tabang sinda kan CHO na ipaliwanag sa sainda kun tano ta dapat matudokan nganing makalikay sa ‘‘deadly virus’’, sabi pa ni Beltran.
Afuera sa saindang pag-ehemplo ki Rañola, sinabi pa kan Liga Presidente pig-ehemplo pa ninda an ginibong pag-ineksyon nin vaccines sa anti-flu sa SC na kadakul si mga nagpatudok.
An City Hall nagpaconducir nin survey sa residentes kan barangay kabale na an SC asin nagluluwas na mga ‘‘undecided’’ mala ngani kabale sa takot sa bakuna iyo an ibang mga BHWs.
Si Consejal Rañola, Chairman kan Committee on Health sa SP nag-apelo sa SC na dapat nindang suportaran an vaccination program kan gobierno na iyo an solusyon nganing magkulpa an nagpaparalangkaw na caso sa virus.
Hagad pa kan consejal sa publiko nganing makalikay sa nakakaulakit na helang kaipuhan magsunod sana sa gabos na health protocols.
Ini dakulang proteksyon sa sainda man sanang salud nganing dai magparalangkaw an caso.
An lokal na gobierno kan Ciudad nin Naga nakatapos na kan saindang simulation exercises (SimEx) kan nakaaging Martes, Marso 30 bilang pag-andam sa actual rollout, sa pagabot kan suplay kan Covid-19 vaccines. (DPAureus)