SA PEÑAFRANCIA FESTIVAL: 1-M debotos maruso sa Traslacion procession ni Ina

Nag-aarabotan na an ribo-ribong debotos ni Nuestra Señora de Peñafrancia asin Divino Rostro sa pilgrim city of Naga para sa Traslacion procession ngunian na Viernes, Septiembre 13, 2024 mantang andam na sa pagmantenir sa paz orden an Naga City Police Office (NCPO).

An imahen ni Ina asin Divino Rostro maestar sa Naga Cathedral sundo sa Fluvial Procession sa paagi kan Naga river sa Septiembre 21.

Pigkakarkulo kan mga awtoridad abot sa on milyon na debotos an maruso siring kan nakaaging taon sa mga kalye sa ciudad sa pagpoon kan novenario sa Naga Metropolitan Cathedral.

Mas mahibog an debotos sa nakatalaan na historicong celebrasyon sa Septiembre 20, 2024 sa pagcomemorar kan ika-100 taong anibersaryo kan "Coronation Anniversary sa Our Lady of Peñafrancia as Siempre la Reina de Nuestra Region, Patrona de Bicolandia’’. Sa kaparehong petsa alas 4:00 nin hapon sa Naga Cathedral gigibohon an Holy Mass and Reenactment of the Cononical Coronation, alas 7:00 nin banggui iyo an Procession Triunfal para la Reina Celestial Coronada.

Magiging presente sa actividad kan simbahan papangenotan ni Apostolic Nuncio to the Philippines Archbishop Charles John Brown, D.D. asin cincuentang mga obispo hale sa ibang ciudades sa Bicol asin iba pang lugar.

An Bicol PNP sa pamamayo ni BGen Andre Dizon nagpadara nin maabot sa 1,500 na augmentation force sa NCPO afuera kan 300 na kapupulisan hale sa Camarines Sur PNP Provincial Office. Igua man dagdag na augmentation force hale sa 9th Infantry Division kan Philippine Army.

Si City Director Col. Erwin Rebellion nagpahayag na nadestino sinda nin mga police sa Naga Cathedral, Peñafrancia Shrine asin Basilica Minore nganing maseguro an paz y orden. Laen pa kaini, mawarak pa nin kapupulisan sa centro commercial, terminal sa mga matatawong lugar saka sa gigibohon na Traslacion asin Fluvial procession.

TRASLACION PROCESSION. Pagbalyo kan imahen ni Nuestra Señora de Peñafranca sa Metropolitan Cathedral para sa siyam na aldaw na novenario.