SA PEÑAFRANCIA FIESTA: Bagong rector kan Basilica mapaluwas nin bagong plano

An bagong rector kan Peñafrancia Basilica Minore sa Barangay Balatas, Ciudad nin Naga piglalaoman na mapaluwas nin bagong mga plano para sa Translascion procession asin Fluvial procession para sa maabot na Peñafrancia fiesta 2023.

Si Fr. Louie Occiano, director kan Caceres Commission on Communication (CCCOM) nagpahayag sa miembros kan media na si Msgr. Noe Badiola, bagong rector igwang mga pig-aandam na plano nganing maging maluwag kumpara kan nakaaging taon.

Kun ano an bagong estratihiya sa Traslascion asin Fluvial procession asin iba pang programa kan simbahan dai paman sinabi kan CCCOM.

An simbahan asin an City Hall maging Naga City Police Office igwa nang mga koordinasyon komo preparasyon sa dakulang actividades sa festividad ni Ina.

Igwa nang mga pigbilog na komite an lokal na gobierno kabale na an hahagadon kan NCPO na augmentation force kan Bicol PNP.

Posibleng dai na hagadon kan City Hall na ideclara an gun ban sa ciudad sa panahon kan Peñafrancia fiesta nganing maseguro an paz y orden. An dahilan epektivo na sa Agosto 28 hasta Noviembre 29, 2023 an Comelec gun ban. Ini kasunod man kan nakaatalaan na sarabay na eleksyon sa Sangguniang Kabataan asin Barangay sa Oktubre 30, 2023.

Kan mga nakaaging mga taon cada Peñafrancia fiesta napasar nin resolusyon an Sangguniang Panlungsod nganing hagadon sa PNP na iimplementar sa ciudad an gun ban.