SA PEÑAFRANCIA FIESTA: CamSur PPO andam magpadara nin augmentation force sa NCPO

Andam magpadara nin augmentation force an Camarines Sur PNP Provincial Office (PPO) sa Ciudad nin Naga sa panahon kan Peñafrancia fiesta tanganing maging katuwang kan Naga City Police Office (NCPO) sa pagmantenir nin paz y orden.

Laen ini sa ginatos na augmentation force hale sa Camp Semion Ola kan PNP sa Ciudad nin Legazpi para maseguro an seguridad sa piglalaoman na ribo-ribong debotos ni Nuestra Señora de Peñafrancia.

Si P/Major Maria Victoria Abalaing, parataram kan PNP Provincial Office nagsabi na nakatalaan sindang mag-full out nin sampolong kapupulisan sa cada Municipal Police Station cada banwaan asin igua pang maghahale sa duwang Mobile Force kan PNP Provincial Camarines Sur na posibleng aboton nin labing 500 na miembros kan PNP.

Mabugtak pa sinda nin mga Public Assistance sa centro kan ciudad maging harani sa simbahan.

An Bicol PNP sa pamamayo ni BGen Andre Dizon dai pa napaluwas nin kumfirmasyon kun perang miembros kan augmentation force an saindang ipapadara alagad kan mga nakaaging Peñafrancia fiesta inaabot sa 800 na mga pulis.

Afuera pa kaini, an 9th Infantry ‘'Spear’’ Division kan Philippine Army cada kapiestahan ni Ina napadara man kan saindang augmentation force.

Katuyohan kan PNP asin Philippine Army para maseguro an seguridad bako lang sa Traslacion asin Fluvial procession ni Ina envez sa gabos na mga actividades sa laog kan ciudad.