SA ROAD CLEARING OPERATION: DILG: Halion an mga ilegal na estractura sa tinampo

An opisina rehiyonal kan Department of Interior and Local Government (DILG) liwat naman estrictong ma-imponer na seguradohon na niradas na an mga ilegal na estractura sa road right of way alagad bako lang sa lokal na gobierno envez pababa sa barangay level.


An mga LGUs activo naman sa road clearing operation sagcod sa estrictong implementasyon sa traffic ordinance nganing malinig an ulang sa tinampo para dai masitar kan DILG Inspection Team.


Si Director Anthony Nuyda kan DILG Bicol nagbilog na nin mga inspection team para maglibot sa barangay maging sa municipal/city road hasta sa national road tanganing aramon kun nagsusunod kan direktiva kan saindang opisina central sa road clearing contra sa mga ulang sa tinampo.


Nagkapera nang mga LGU an nasangatan nin caso administrativo kan DILG sa enot na implementasyon kaini kan dai pa nagkakaigwa nin pandemya.


Sa Ciudad nin Naga, si Renne Gumba jefe kan Public Safety Office na natukahan ni Alcalde Nelson Legacion sa mga road clearing operation nagsabi an grupo kan DILG ma-inspeksyon sa ciudad ngunian na Enero 22.


Alagad saiyang piglinaw na bako nalang an City Hall an envuelto digdi envez an opisyales de barangay.


Naglaylo sana an ahencia kan abuton kan pandemya sagcod na nagkaigwa nin nationwide General Community Quarantine na pig-declara ni President Rodrigo Duterte kan Marso 16, 2020.


Dakul naman na mga ilegal na estractura sa tinampo an pinaharale kan LGUs asin barangay councils mantang ciertong papasimbagon sinda kan DILG kun tano ta dai nag-iimplementar kan directiva.


An report kan inspection team iyo an pigbabasehan kan central office kun dapat casohan an alcalde sa dai pag-implementar kan road clearing operations.


Si Presidente Duterte iyo an nagsugo sa DILG na iimplementar kan LGUs nganing gabos na ilegal na estractura mahale sa mga road right of way.


An directivang ini nakakatabang sa Department of Public Works and Highways (DPWH) sa saindang pig-iimplementar na road widening projects. (DPAureus)