SA SP CAMARINES SUR: Minoriya miembros mayongcommittee chairmanship

Pili, Camarines Sur --- Gustohon man kan minoriya miembros kan Sangguniang Panlalawigan kan Camarines Sur na magpugol nin chairmanship nin ano man na komite alagad dejado an grupo.

An tolong mga vocal na oposisyon asin kan Anduyog Party kinababalehan ninda Abogado Emmanuel Llaguno asin Eugene Fuentebella, parejong taga cuarto distrito asin Vanesa Señar kan tercer distrito na dating Liga nang mga Barangay President kan Magarao, Camarines Sur.

Piglinaw man ni Vokal Romulo Hernandez kan segundo distrito kan Camarines Sur kun dai natawan nin ano man na komite an nasa oposisyon huli ta dai man sinda nag-nominate.

Dawa mayo sindang pugol na komite, sinabi ni Llaguno dapat isikwal ni Bise Gobernador Salvio Fortuno Jr an politica sa sanggunian. Saiyang sinabi na ‘‘idolo niya an ama ni Sal Jr. na si dating Congressman Sal Fortuno na kan ini pa an VG asin presiding officer marhay an tratamiento sa gabos na miembros na mayong politica.’’

Tiwala an oposisyon na igwang panindugan an bise gobernador siring kan saiyang political jingle kan panahon nin eleksyon kan Mayo 9, 2022 ‘‘nagmana sa Ama, nagmana sa Ina’’.

Ok lang kun mayo sindang komite, sabi pa.

Sa internal rules kan SP an Committee Chairman iyo an puedeng magpili kan saindang vice chairman asin member.

Si Hernandez. Chairman kan Committee on Rule asin Laws and Review asin nasa mayoriya na kaalyado ni Gobernador Luigi Villafuerte, nagpahayag sa Bicol Mail na makua siyang miembro sa saiyang komite hale sa minoriya.

An bagong komposisyon kan junta provincial na mayoriya kaalyado ni Gobernador Villafuerte (PDP-Laban) na gabos nagpupugol nin committee chairmanship kinababalehan ninda, Waren Señar kan premir distrito; Nino Tayco asin Romulo Hernandez kan segundo distrito; Pol Manaog kan tercer distrito; Donna Onate, Shai Noble asin Butchokoy Oliva, gabos kan ika-limang distrito asin Bise Gobernador Fortuno Jr, presiding officer. Kabale sa grupo iyo an mga Ex-officio member na sinda Vokal Russel Pala asin Vokal Alejo Sayson.

An mga kaalyado ni Villafuerte na mapugol nin mga committee chairmanship kinababalehan ninda Vokal Señar - chairman kan Committee on Finance and Apropriation asin Committee on Ways on Means; Vokal Tayco - chairman kan Committee on Tourism, Information asin Games and Amusement; Vokal Hernandez - Majority Floor Leader, Committee on Laws and Internal Rules; Vokal Manaog - Committee on Agriculture; Vokal Onate - Committee on Barangay Affairs, Committee on Health and Sanitatiom and Population; Vokal Oliva, - Committee on Social Services and Community Development asin Committee on Disaster Environment Natural Resources, Vokal Noble - Committee on Education, Committee on Administrative Cases, Committee on on Common Resources Information and Utilities; SK Federation President, Vokal Pala – Committee on Youth and Sports, Gender and Development asin PCL President, Vokal Sayson – Committee on Municipal Affairs and Sisterhood. (dpa)