SABI KAN DILG: LGUs dapat maghiro na kontra dengue

An Department of Interior and Local Government (DILG) nagpaluwas nin direktiba sa mga lokal na gobierno na magtarabangan sa kampanya laban sa naglalangkaw na caso nin dengue sa rehiyon.


Si Director Anthony Nuyda kan DILG Bicol nagpahayag kaini, sa tahaw kan haros kontrolado na an paglangkaw kan Covid-19 cases, dapat tawan atensyon kan LGUs an advocacia sa kalinigan sundo sa barangay kontra sa estaran kan dengue namok.


An caso sa dengue sa Bicol naglangkaw poon na maglaog an bulan nin tig-uran base sa naikurit na caso kan Department of Health sa rehiyon.


Kun nagtarabangan an opisyales lokal asin iba pang ahencia kan gobierno laban sa virus dapat magkaigwa nin kooperasyon an LGUs asin iba pang ahencia nganing maseguro na dai na magparalangkaw an caso kan dengue, sabi pa kan DILG Bicol.


An mga LGUs igwa kan saindang kanya-kanyang Municipal Health Officer maging kan Barangay Health Workers (BHW), dakulang bagay an organisasyon na ini sa paglaban kontra sa caso kan dengue.


Nahasa na an BHWs sa 4:00 o’clock habit mantang an MHU saro sa saindang ipapadagos iyo an fogging operations sa mga barangay asin escuelahan.


Alagad bako sanang LGUs asin BHWs an dapat maging envuelto digdi envez an Department of Education na dapat seguradohon an kalinigan an kapalibotan kan saindang escuelahan.


An DepEd nag-aandam na kan full face-to-face classes sa bulan nin Noviembre 2022 na kabali sa programa kan ahencia iyo an pagtarabangan sa kalinigan sa kapalibotan nganing mahale an mga estaran kan dengue namok. (dpa)