top of page

SABI KAN SARONG PUNONG BARANGAY: Legacion iyo an may kakayahan ipapondo an sugal na STL/jueteng

An tolong taon nang ilegal na operasyon kan Small Town Lottery (STL)/jueteng sa Ciudad nin Naga, solamente si Alcalde Nelson Legacion an may kakayahan nganing mag-orden sa Naga City Police Office (NCPO) na ipapondo an nagdadanay na ilegal na sugal.


Si Punong Barangay Pedro San Juan Jr. kan Balatas, Ciudad nin Naga nagpahayag kaini sa entrevista ninda Ed Ventura asin Grace Inocentes sa programang ‘‘Doble Pasada’’ sa RMN DWNX.


Saro sanang order kan alcalde pondo yan, sabi pa.


Kan panahon ni Alcalde John Bongat tinawan franquicia sa ciudad an operasyon kan Even Chance Gaming Corporation nganing digdi gibohon an bola kan STL mantang makikinabang digdi an City Hall huli ta igwang ingreso an ciudad.


Alagad ngunian na panahon lugi na an City Hall huli ta mayong nakakabig na ingreso. Sinabi pa ni PB San Juan sa laog nin tolong taon kan ilegal na sugal lugi nang marhay an ciudad mantang pera sana an ‘‘nakikinabang’’.


Dinagdag pa kan Punong Barangay na kan bako pa siyang pamayo kan Barangay Balatas dati siyang envuelto sa ilegal na sugal na jueteng alagad kan maging opisyal siya tinalikodan na an sugal. Aram niya sa ciudad nin Naga sana sobra sa milyon pesos aroaldaw an koleksyon kan STL, naghihinayang siya huli ta pera sana sa ciudad an nakikinabang.


An mga LGUs, PNP asin iba pang ahencia igwang kaherasan sa operasyon kan STL susog sa franquicia na pig-isyu kan PCSO sa Even Chance.


Sa lado ni Alcalde Nelson Legacion bilang pamayo kan ciudad saiyang pinahayag sa miembros kan media na nagsugo na siya sa NCPO na pondohon an STL sa ciudad.


Maging man si City Administration Elmer Baldemero nagpahayag na nagkapera nang veces nag-orden an alcalde na pondohon an sinambit na sugal.


An jefe ejecutivo kan mag-asumir pa sana sa premirong termino naglinaw na kontra siya sa sugal kaya ngani dai nagtugot na tawan franquicia an Even Chance Gaming Corporation.


An isyu sa STL/jueteng sa ciudad liwat naman nabukasan kan City Hall sa paagi kan privilege speech ni Consejal Salvador Del Castillo sagcod na hinahagad ninda mga paliwanag ninda City Director Col. Nelson Pacalso kan NCPO, PCSO Manager Jobet Ramos asin PB San Juan.


Sinabi pa ni San Juan na nag-atendir siya sa imbitasyon kan SP nganing linawon na dai siya envuelto sa ilegal na actividad.

Comentários


bottom of page