SARONG TAON ANTES NAAPRUBARAN SA SP: Capitolio mautang P650-M

Pili, Camarines Sur --- Matapos nin may sarong taon na pendiente an inuutang na P650 milyon kan gobierno provincial kan Camarines Sur, pinalmente inaprubaran kan Sangguniang Panlalawigan (SP) sa ginibong sesyon regular kan Hunyo 30 na mayo na nin nagcontra dawa sa lado kan oposisyon.

Si Vocal Romulo Hernandez nagtukaw na acting presiding officer sa sesyon kan aprubaran an inuutang kan Capitolio Provincial nagpahayag dai na nagkaigwa nin halawig na debate sa mayoria asin nasa oposisyon kan SP mantang kumpleto na an gabos na mga rekisitos kan Bureau of Finance kabale sa mga pigpresentar iyo an mga proyekto na papabulosan kan ginatos na milyones peso na uutangon.

An fondo uutangon sa Development Bank of the Philippine (DBP) gagamiton sa mga proyekto sa infrastraktura kabale na an mga patinampo, covered court sa mga barangay, proyekto sa turismo maging school building asin iba pa.

Dai kaayon sa papabulosan nin fondo an ipapatindog na Iconic Capitol mantang igwa nang suhay na alokasyon hale sa Department of Public Works and Highways (DPWH).

Nag-aabot na sa P4 bilyon an annual budget kan provincia asin kayang mabayadan an obligasyon sa bangko alagad dai naman sinabi kun perang taon babayadan, sabi pa.

Si Hernandez, nagrerepresentar kan segundo distrito kan Camarines Sur sa sangguniang asin Vice Chairman kan Finance and Appropriation Committee nagpahayag na dai nin kaulangan an Capitolio sa pag-utang kan dakulang cantidad sa bangko mantang tapos na si gabos nindang obligasyon.

Sa mga pagduda kan mga kalaban sa pulitika na posibleng gamiton sa eleksyon mantang sampolong bulan na antes kan pirilian sa Mayo 9, 2022, saiyang piglinaw na kan taon pang 2020 pigpunan an deliberasyon alagad naabala huli kan controvercia sa pagcuestion kan ibang mga vocal na bakong kaalyado ni Gobernador Migz Villafuerte, nalinaw na an gabos na isyu dai na sinda nagcontra.

Tinawan na nin awtorisasyon an jefe ejecutivo nganing iyo an magpirma kan mga dokumento sa transaksyon sa bangko.

An mga miembros kan SP kinababalehan ninda Romulo Hernandez asin James Jaucian kan segund distrito; Angel Naval kan tercer distrito; Emmanuel Noble asin Wilfredo Oliva, Relan Besinio kan Liga ng mga Barangay asin Russel Pala kan Sangguniang Kabataan Federation, sinda anas kaalyado ni Gob Villafuerte asin bise gobernador Imelda Papin. Mantang sinda Trexie Clemente-Maquiling kan premir distrito; Nelson Julia kan tercer distrito, Emmanuel Llaguno asin Gerald Pilapil kan cuarto distrito asin Ruperto Alfelor kan ika-limang distrito, anas mga oposisyon. (DPA)