SB kan Pili, Camarines Sur atras-abante sa resolusyon

Atras, abante an mayoria sa miembros kan Sangguniang Bayan kan Pili, Camarines Sur matapos paboran sa division of the house an sarong resolusyon alagad nagsibog nganing pirmahan huli sa pulitica.


Apesar na inaapod sindang ‘‘honorable’’ alagad ribong kan saindang panindugan kun ano an binotohan na resolusyon.


Si Consejal Narcel Lopez nagbuyagyag kaini matapos paboran kan mayoriang miembros an saiyang pinadrenohan na resolusyon na naghagad nin Php30,000 na funding assistance sa Department of Budget and Management (DBM) nganing gamiton sa farm to market road sa barangay San Agustin.


Nagpasalamat an mga residentes kan barangay nganing mapakarhay an saindang tinampo asin pacil an paghakot nin produkto agricultural pasiring sa mercado alagad ibinasura kan mayoriang miembros kan SB.


An dahilan sana an nagpadreno si Consejal Lopez, miembro kan oposisyon kaya naging drawing si pangiturogan kan mga taga San Agustin huli ta dai marerealisar an farm to market road sa saindang barangay.


An nagpirma sana sa resolusyon sinda Consejal Francis Belen asin an pagdreno na si Lopez na parehong kaalyado ni Alcalde Tomas Bongalonta mantang an nagcontra iyo si Consejal Agusto Camano.


An nagboroto pabor sa resolusyon alagad nagbawi sinda consejales Violeta Mercilita De Mesa, Netsita Malate, Romeo Salazar, Efren Amesola, Roger Regondola asin Liga ng mga Barangay President asin ex-officio member Nerio Brazal asin SK Federation President asin ex-officio member Amniel Tormes.


Si bise Alcalde Marivic Solano asin an mayoriang miembros mga contra sa administrasyon ni Bongalonta asin kaalyado ni Gobernador Migz Villafuerte.


Sinabi na kan an mayoriang miembros nagpadreno nin resolusyon na naghahagad nin funding assistance para sa farm to market road saindang sinuportaran ni Consejal Belen asin dai nag-atras abante sa desisyon.


Pigbuyagyag pa huli kan mainit na pulitica sa saindang banwaan an mga proyecto sa mga barangay na dapat iimplementar ni Bongalonta parating pig-uulang.