SK, Barangay elections yaon sa desisyon kan congreso kun isisibog

An eleksyon sa barangay kun masusunod an ley dapat gibohon cada ika-tolong taon alagad yaon sa desisyon kan congreso kun sainda liwat isisibog an nakatalaan na Sanggunian Kabataan (SK) asin barangay elections sa Deciembre 5, 2022.

Si Liga ng mga Barangay President Dodith Beltran asin elihidong consejal kan Ciudad nin Naga nagpahayag ano man na ‘‘postponement’’ kan nakatalaan na SK asin Brgy elections paborable sa mga nakatukaw sa puesto mantang contra digdi an nag-aambisyon na magcandidatong kapitan asin barangay kawagad.

Kun digdi sa ciudad mayong problema an ‘‘postponement’’ huli ta sa pag-gogobernar nababantayan asin nasusunod an mga programa asin polisiya na mawot iimplementar ni Alcalde Nelson Legacion, sabi pa ni Beltran.

An Commission on Election (Comelec) nag-aandam na kan naka-calendaryo eleksyon sa Deciembre 5 mantang igwang alokasyon an gobierno nasyonal alagad an desisyon kun isisibog yaon na an bola sa congreso.

Nagkapera nang mga lehislador nagpahayag na dapat isibog an SK asin Barangay elections mantang natatapos palang an eleksyon kan Mayo 9, 2022.

Duwa nang veces sinibog an SK asin Barangay elections sagcod napapalawig an termino kan barangay apat hasta sa limang taon asin sa ngunian yaon naman an homa na dai madadagos.

Huli kaini, dapat mag-desisyon na nin amay an congreso, sabi pa kan pamayo kan Liga.

Si Beltran nakatalaan na mag-asumir komo regular na miembro kan Sangguniang Panlungsod sa Hunyo 30 udto asin an maribay sa saiya iyo si Kapitan Corazon Peñaflor kan barangay Calauag iyo an saiyang ‘‘immediate successor’’ na iyo an saiyang bise presidente kan Liga ng mga Barangay.

Si Beltran mahelig naman komo Punong Barangay kan Bagumbayan Norte asin an saiyang ‘‘immediate successor’’, si Brgy Kagawad Raquel Totanes. (DPAureus)