Social media causa sa halangkaw na caso sa teenage pregnancy-POPCOM

Na-aalarma na an opisina rehiyonal kan Commission on Population and Development sa Bicol sa naglalangkaw na caso sa mga menor de edad na nagbabarados alagad an saro sa causa na naheheling kan ahencia iyo an social media sa pinapaluwas na saltong informasyon asin kakulangan kamunikasyon kan magurang.

An solusyon kan POPCOM Bicol iyo an pagkaigwa nin information drive sa tabang kan mga escuelahan asin mayormente an magurang nganing maprotehiran an saindang mga aking menor de edad.

Ini an mga pahayag ni regional director Odette Nationalist nin huli ta an Bicol dai nagpapahuri sa may halangkaw na caso sa teenage pregnancy.

Sa report na saindang nakua sa Philippine Statistic Authority (PSA) kan taon 2019 na hale sa mga Local Civil Registry, igwa duwang doce anyos sa rehiyon an nag-araki, dai pa ninda makua an pinakahuring listahan kun igwa pang kaparejong insidente kan 2020.

Sinabi pa ni Nationalist an iba pang teenage pregnancy nangyayari pa sa mga edad nin 13 anyos na igwang 16 na caso; 79 mga nag-eedad nin 14 anyos; 387 nag-eedad nin 15 anyos; 962 mga nag-eedad nin 16 anyos; 1,820 mga nag-eedad na nin 17 anyos. Sa total na mga nag-eedad nin 12 hasta 17 anyos igwa ining maabot sa tres mil.

Mantang sa 107 na nag-araki sa bilog na taon an saindang mga magurang nag-eedad nin 49 anyos asin igwang tolo sa cada 100 mga menor edad, sabi pa kan POPCOM Bicol.

Sa LCR office kan Ciudad nin Naga kan taon 2018 nakarehistro nin 328 caso alagad an 42 an liwat nagpadagos asin sa datus kan 2019 naglangkaw an teenage pregnancy na nag-abot sa 368, alagad dai pa kabale digdi si hale sa itaas na barangay na dai nagpapalista.

Saro pa sa naheheling na problema iyo an kakulangan nin kamunikasyon kan magurang asin jovenes asin kawaran superbisyon sagcod kumplikto sa laog kan familia. (dpa)