STL/jueteng sa Naga dai napapapondo kan NCPO

Apesar kan kumfirmasyon ni NCPO City Director Col. Nelson Pacalso na mayong nagrerecibing payola sa arin man na miembros kan Sangguniang Panlungsod para sa proteksyon kan ilegal na STL/jueteng sa laog kan Ciudad nin Naga alagad maapat nang bulan matapos mag atubang sa sesyon regular kan SP sagcod sa ngunian nagpapadagos an ilegal na sugal.

Si Consejal Vidal Castillo kan SP kan makaulay kan Bicol Mail nagpahayag na liwat niyang pinapagirumdum an pamayo kan NCPO kan mag-atender sa sesyon kan SP kan Febrero 2022 asin matolong taon nang nagdadanay an ilegal na sugal dapat panahon nang ipaheling niya sa mga taga ciudad na pusog an saiyang liderato nganing darakopon asin mapundo an sugal sa saiyang area of responsibility.

Nagirumduman ni Consejal Castillo kan hapoton niya sa sesyon regular kan SP si Col. Pacalso ‘‘ano totoo an pigsasabi mo na ni saro sa miembro kan Sangguniang Panlungsod mayong nagrerecibe nin payola hale sa STL/jueteng?, an simbag MAYO’’. Kun mayo ano ta dai napapondo, sabi pa kan consejal.

An NCPO nagkatolo nang veces nag-atender sa imbisyasyon kan SP sa isyu sa STL/jueteng asin yaon pa an presencia ni Camarines Sur PCSO Provincial Manager Jovet Ramos, alagad dakulang kahapotan apesar na mayong permit an City Hall asin matolong taon na dai napapapondo an sugal. Napondo sana an sugal nin dikit na panahon huli sa pandemya.

Sesyon regular kan Sangguniang Panlungsod kan Febrero 7, 2023 bisita si CD Col. Nelson Pacalso (sa wala) hinahapot ni Consejal Vidal Castillo (sa too) sa dai napapapondong ilegal na STL/jueteng sa Ciudad nin Naga. (SP NC)

An opisina kan alcalde kan ciudad, sinabi sa miembros kan media ni City Administrator Elmer Baldemoro na haloy nang nagsugo an jefe ejecutivo na ipapundo an sinambit na controvercial na sugal.

Sinabi ni Ramos kan an gabos na operasyon kan STL sa nasyon liwat nabuhay matapos tugotan kan gobierno nasyonal, alagad an regional trial court sa ciudad na ini sa paagi kan Branch 23 nag isyu nin ‘‘cease and desist order’’ sa Evenchance gaming corporation na magpondo kan operasyon kan STL sa ciudad.

Huli kan orden kan jusgado, mayong operasyon kan STL sa ciudad. Dawa na ngani si ‘‘draw court’’ naghale na sa ciudad nganing daing kumplekto sa implemtasyon kan law enforcement.

Kasunod kaini, ‘‘an gabos na betting games sa Ciudad nin Naga, dawa dai naka-uniform o dai, dapat dai awtorisado kan PCSO,’’ sabi pa ni Ramos.

Kan panahon sa administrasyon ni dating Alcalde John Bongat nagdanay an sugal mantang igwang permiso an lokal na gobierno, alagad tinuyaw ni Consejal Salvador del Castillo na hababaon bulan-bulan an pigtataong remiso sa City Treasurer’s Office. (dpa)