Suporta sa sektor nin agrikultura dapat pakusogon kan gobierno

Mantang nag-aatubang an nasyon sa pighahaditan na global ‘‘recession’’ sa 2023 an Agri Party List naghihiro na ngunian nganing masimbagan tolos nin dakulang suporta an sektor agrikultura para mapalangkaw an produksyon asin mapaasenso an hanap buhay kan mga paraoma asin parasira.

Ini an mga pahayag ni Agri Party List Congressman Wilbert T. Lee sa saiyang paglibot-libot asin konsultasyon sa mga LGUs, grupo nin parasira asin paraoma sa ginigibo kaining Agri Sectoral Consultation sa Bicol asin iba pang provincia.

Igwa na siyang pigtutulod na house bill nganing mapaangat an pagbuhay kan mga paraoma asin parasira para sa ‘‘food sufficiency’’ na bako lang pag-asenso sa sinambit na sektor envez maging an consumedores. ‘‘Kun halangkaw an suplay na pigdadara sa mga mercado hali sa paraoma asin parasira, puedeng magbarato an presyo simbag pa sa pighahaditan na ‘‘recession’’.

Kun marealisar ini dai na-aapektaran an ‘‘inflation’’ na ngunian minamate na kan namamanuan Filipino.

Nagtutubod an Agri Party-List sa liderato ni Presidente Ferdinand Marcos Jr. bilang secretaryo kan Department of Agriculture makakatabang sa sektor agricultura nin huli ta naiintindihan niya an kamugtakan ninda.

Sinabi pa ni Cong Lee maninigo nang madagdagan nin suporta kan gobierno an post harvest facilities na saro ni sa makakatabang nganing mapalangkaw an income kan sinambit na sektor.

Dinagdag pa kan Agri Party List sa ngunian naghahanap na sinda mga programa sa organic farming asin organic fertilizer production. Mawot kan Bicolanong lehislador an modelo kan programang ini na puedeng maadaptar sa enterong nasyon. (DPAureus)