Suspechado sa masaker sa Milaor yaon pa sa Bicol

Nagtutubod an Milaor Municipal Police Station (MPS) sa Milaor, Camarines Sur na yaon pa digdi sa Bicol si Arthur Del Leon, suspechado sa masaker sa limang persona na saiya man sanang partidaryos sa Barangay Tararusanan na nangyari kan Noviembre 5, 2021.


Naghahalat nalang an MPS kan mandamiento de aresto hale sa jusgado matapos isangat an limang casong murder asin sarong frustrated murder sa Provincial Prosecutor’s Office sa Ciudad nin Naga.


Si M/Sgt. Niño Bragais, opisyal na parataram kan MPS nagpahayag na posibleng dai pa nakakaluwas sa rehiyon an suspechado sa makangirat na krimen.


Sinabi pa na kumpleto an mga evidencia kan mga awtoridad sa caso na sinangat sa fiscalia kabale digdi si mga affidavit kan tolong mga testigos, death certificate kan mga biktima, laboratory result hale sa PNP Crime Laboratory asin iba pa.


An familia nagtutubod na oras na madakop an suspechado matatawan man giraray justicia an mga biktima.


Magigirumduman an insidente nangyari alas 5:45 nin hapon kan Noviembre 5 sa Zona 1, Barangay Tarusanan, Milaor, Camarines Sur. An suspechado dating seaman, armado nin M-16 armalite riffle na nilaog an residencia mientras na nagdadalan nin TV pinagbabadil an mga biktima.


An limang mga ginadan kan suspechado na saiya man sanang pinsan kinababalehan kan saiyang uncle, Romeo Del Leon, 72, Samuel Cobilla, 21, Noela Agliones, 7. Hobbie John, 6, Robbie John, 4, gabos may apelyedo Britanico. Saro pang menor de edad, Hades John Britanico, 9, iredo asin iyo an nakasalbar an buhay sa pang-aatake.


Perang aldaw matapos kan masaker an MPS nakakua nin search warrant sa corte nganing halughogon an residencia ni Arthur De Leon sa Barangay Tarusanan asin nabawi an sarong granada, mga bala kan calibre 45, calibre 45 asin iba pang armas mantang an suspechado dai na inabutan.


Igwa nang total na Php600,000 na patong sa payo sa suspechado oras na madakop asin maitukdo sa awtoridad. An Php500,00 hale ki dating Congressman Rolando Andaya Jr. asin Php100,000 hale ki Alcalde Anthony Reyes kan LGU Milaor. (dpa)