Suspechadong paralupig sa Sagñay, CSur maatubang liwat nin kaparejong caso

Bordado, Jovi Fuentebella nagtaong pabuya


Pig-aandaman na kan Municipal Police Station sa Ocampo, Camarines Sur an mga caso naman nin panlulupig sa sarong suspechado na dati nang nag-aatubang nin kaparejong caso sa menor de edad sa barangay Nato, Sagñay, CamSur na nangyari kan Abril 2022.


Si P/Maj Ryan Bagalacsa, OIC Chief of Police kan MPS sa banwaan nin Ocampo nagpahayag na sainda nang pig-aandam an mga dokumento nganing sangatan nin casong panlulupig an suspechadong si Enrique Algaba y Rivera kan brgy. Turaque, CamSur.


Si Algaba iyo an pigtutukdo na suspechado sa duwa kan apat na paratukdo sa sarong escuelahan sa Ocampo na nangyari kan Agosto 8, 2022.


Afuera kan casong rape, naghabon pa soboot an suspechado sa escuelahan na pigtutubodan igwa pang mga kaibanan.


Si Deputy Chief of Police Mark Spana kan MPS Sagñay, CSur nagpahayag na an biktimang mga paratukdo nabisto an suspechado sa paagi kan saindang naka-file na retrato na pigbibisto iyo an nag-abuso sa sainda.


Mientras tanto an tugang na babae kan suspechado nag-post sa saiyang FB na si Enrique dai sinda nagtutubod iyo an responsable sa sinambit na krimen huli ta an saiyang trabajo paraataman damulag.


Nganing maparikas na matawan justicia an biktima sinda 3rd district congressman Gabby Bordado Jr. nag-ambag nin tig-a 50 mil pesos o igwa nang total na P100k mantang si Alcalde John Vicente Fuentebella enot nag-andam kan saiyang P50K mantang an biktimang menor de edad taga Brgy. Nato, Sagñay


Si dating alcalde Abang Mabolo nagkumfirmar na nagdugang nin P50k ki Bordado nganing madaling madakop an suspechado na yaon sa saiyang sakop na distrito. (dpa)