Suspension ki Bongalonta pig-apelar sa Malacañan

Pili, Camarines Sur ---Nagplantiar na nin petisyon sa Malacañan si Alcalde Tomas Bongalonta sa banwaan na ini nganing cuestionon an 60 diyas na preventive suspension sa saiya ni Gobernador Migz Villafuerte mantang dinadangog pa an caso administrativo sa junta provincial alagad an alcalde nagtubod na saro sanang harassment asin pamumulitica.


Ini an mga pahayag ni Consejal Narcel Lopez mantang naheheling ninda na mga contra partido sana kan Capitolio Provincial an naheheling asin target sa mga suspension.

PROTESTA VS SUSPENSION. Si Alcalde Tomas Bongalonta (nakataas an duwang kamot) napaluha sa atubangan kan ginigibong protest rally sa Plaza Kiosk matapos marecibe kaini an 60 diyas na preventive suspension hali sa opisina ni Gob Migz Villafuerte. Ginatos na mga suportadores asin opisyales de barangay mga nakapulang T-shirt na presente sa ginigibong protesta. (Carlo Baldoza)


Naglalaom an suspendidong alcalde na dadangogon kan Malacañan an saiyang apela.


Si Bise Alcalde Vicvic Solano iyo na an nag-tutukaw na acting mayor mantang si consejal Francis Belen iyo man an acting vice mayor.


Dai na nagsayuma si Bongalonta sa pagrecibe kan suspension order kan Lunes, Febrero 15 na bitbit kan personajes kan Capitolio Provincial kan Camarines Sur na sinabat pa nin music band alagad nagkaigwa nin ceremoniya sa Plaza Kiosk mientras na palibot nin mga suportadores kan alcalde, grupo nin paraoma, opisyales de barangay asin iba pang grupo na nagkaigwa pa nin matuninong na programa sa atubangan kan publico.


Si Vocal Angel Naval, chairman kan Special Committee on Administrative Cases sa junta provincial nagpahayag na siyam nang bulan an inaatubang na caso kan jefe ejecutivo kan Pili asin nag-agi sa gabos na proceso antes saindang hinaman an resolusyon na nagrerecomendar sa gobernador na ipasairarum sa preventive suspension an alcalde.


Saiyang sinabi an reclamo laban sa alcalde apesar na ibinasura na kan Sangguniang Bayan an ‘‘concurrence’’ sa saiyang pignombrahan na Municipal Administrator Engr. Rex Resuena asin disapproved kan Civil Service Commission, pigpadagos niya na mag-punksyonar bilang municipal administrator asin nagrecibe pa nin sueldo.


Matapos dai makumfirmar an nombramiento ni Resuena, pignombrahan bilang jefe kan Local Disaster Risk Reduction Management Office sagcod na pigdesignar giraray komo municipal administrator, sabi pa ni Naval.


Sa ginibong ceremonya sa Plaza Kiosk dakul na mga residentes an napaluja sa suspension sa alcalde mantang nagkapera nang veces ining kinastigo kan Capitolio Provincial sa ika-duwang termino alagad nasangat nin petisyon sa Malacañan sagcod na ibinabasura an mga caso.


Si dating bise gobernador Ato Peña na taohan na kan suspendidong alcalde nagpahayag man na saiyang kinokundenar an suspension sa alcalde envez na magtrabajo alagad perwisio sa LGU. (dpa)