Tarifa kan Casureco II naghuros sa P11.29, isyu sa ‘refund’ iginilid

Matapos kan order kan Energy Regulatory Commission (ERC) petsado Abril 17, 2023 sa Camarines Sur II Electric Cooperative (Casureco II) na tapyasan an tarifa sa kuryente alagad nagdesisyon na iimplementar epektibo kan Mayo 19, 2023 alagad sa kasugoan sa ‘‘refund’’ dai pa makabiklad kun pera an cantidad sa dahilan na maagi pa sa proceso sagcod na magkaigwa pa nin laban legal.

Sa press conference ninda General Manager Emelita Candia, Director John Paul Santa Ana na presente an gabos na directors sinabi ninda saindang susunodon an ERC order nganing tapyasan an saindang halangkaw na singil sa tarifa asin ibaba sa P11.29 sa residential; low voltage; P10.04 asin sa high voltage P9.06.

Sinabi ninda na harahalawig pa an urulay sa ‘‘refund’’ mantang an ERC iyo an maevaluar kun pera an itatasar alagad andam sinda sa ano man na aatubangon na caso.

Sa order kan ERC an refund dapat poon Mayo 2015 hasta sa presenting taon.

An isyu sa halangkaw na tarifa enot na pigcuestion ni Camarines Sur 3rd district Congressman Gabby Bordado kan magpaapod nin diyalogo sa Casureco II kan Septiembre kan 2022 na inatendiran kan stakeholders asin miembros kan tri-media. Huli kan aksyon kan ERC nagpasalamat man sa desisyon kan ahencia.

Si dating Bise Presidente Leni Robredo nagpaabot man nin dakulang pasasalamat sa naging desisyon kan ERC contra sa halangkaw na tarifa sa tahaw kan reclamo kan miembros-consumedores contra sa singil sa tarifa kan Casureco II.

An dating bise presidente iyo an nag-imbitar sa ERC sa pamamayo ni Chairman Monalisa Dimalanta asin iba pang opisyal kan ahencia nganing maging bisita sa stakeholders-consumers meeting kan Marso 23, 2023 na inatendiran ni Diputado Bordado, Alcalde Nelson Legacion asin iba pang sektors.

Sa sinambit na miting si Dimalanta iyo an nagbuyagyag na base sa saindang nabutbutan na record na an cooperativa nag-iimplementar kan contrata na nagpaso na o mayong pagtugot hale sa ERC; pass-on rates na pigsisingil sa miembros-consumedores na luwas sa tinutugot kan CAP asin dapat maghanap nin power supplier na hababa an tarifa.

Dai nagsarong bulan kan Abril 17, 2023 an ERC nagpaluwas nin order sa pagtapyas tarifa asin refund.

Sa City Hall, si Alcalde Nelson Legacion nagpaapod nin nagkaperang miting sa Casureco II asin stakeholders nganing malinawan an halangkaw na tarifa asin siya an naghagad pa sa PSALM na magsuplay sa cooperativa nin dugang na 20 megawatts mantang hababa an saindang tarifa sa generation cost kumpara sa ibang power suppliers.